वेल्हे, ता. १६ : राजगड तालुक्यातील कानंद गावाच्या हद्दीतील डिंगळी डोंगर परिसरात एका दिवसाच्या नवजात मुलीचा मृतदेह आढळून आल्याने परिसरात एकच खळबळ उडाली आहे. आमगोळीच्या झाडाजवळ हा मृतदेह बेवारस अवस्थेत पडलेला असल्याचे निदर्शनास आल्यानंतर नागरिकांनी तत्काळ पोलिसांना याबाबत माहिती दिली.
माहिती मिळताच वेल्हे पोलिसांनी घटनास्थळी धाव घेतली. पोलिसांनी घटनास्थळाचा पंचनामा करून मृतदेह ताब्यात घेतला. त्यानंतर मृतदेह शवविच्छेदनासाठी पाठविण्यात आला असून नवजात अर्भकाचा मृत्यू नेमका कशामुळे झाला, याचा अहवाल प्राप्त झाल्यानंतरच स्पष्ट होणार असल्याचे पोलिसांनी सांगितले.
प्राथमिक माहितीनुसार मृत अर्भक हे स्त्री जातीचे असून तिचे वय अंदाजे एक दिवस असल्याचे सांगण्यात येत आहे. दुर्गम डोंगराळ भागात अशा प्रकारे नवजात अर्भकाचा मृतदेह आढळल्याने अनेक प्रश्न निर्माण झाले आहेत. संबंधित अर्भकाला त्या ठिकाणी कोणी आणून टाकले, तिच्या मृत्यूमागे कोणते कारण आहे, तसेच या घटनेत कोणाचा सहभाग आहे का, याचा तपास पोलिस विविध अंगांनी करीत आहेत.
घटनेची माहिती परिसरात पसरताच नागरिकांनी हळहळ व्यक्त केली. नवजात बालिकेला अशा अवस्थेत टाकून देणाऱ्या संबंधित व्यक्तींवर कठोर कारवाई करण्यात यावी, अशी मागणी स्थानिकांकडून करण्यात येत आहे. पोलिसांकडून परिसरातील नागरिकांची चौकशी करण्यात येत असून जवळील गावांमध्ये अलीकडील काळात प्रसूती झालेल्या महिलांची माहितीही गोळा केली जात असल्याचे समजते.
या प्रकरणी वेल्हे पोलीस ठाण्यात गुन्हा दाखल करण्यात आला असून पुढील तपास सुरू आहे. या घटनेमागील सत्य उघड करण्यासाठी सर्व बाजूंनी तपास सुरू असल्याची माहिती वेल्हे पोलीस ठाण्याचे प्रभारी अधिकारी किशोर शेवते यांनी दिली.
