भोर : खेड शिवापूर टोल नाक्यावर कर्तव्य बजावत असताना राजगड पोलिस ठाण्याच्या वाहतूक शाखेतील पोलिस हवालदार प्रशांत राऊत यांच्यावर हल्ला झाल्याची घटना घडली. या हल्ल्यात राऊत जखमी झाले असून त्यांच्यावर खाजगी रुग्णालयात उपचार सुरू आहेत. या प्रकरणात पोलिसांनी एका आरोपीला ताब्यात घेतले असून दुसरा आरोपी फरार आहे.
मिळालेल्या माहितीनुसार, खेड शिवापूर टोल नाक्यावर वाहतूक नियमनाचे काम सुरू असताना काही व्यक्तींशी वाद झाल्यानंतर पोलिस हवालदार प्रशांत राऊत यांच्यावर हल्ला करण्यात आला. या हल्ल्यात त्यांना दुखापत झाली. घटनेनंतर त्यांना तातडीने उपचारासाठी खाजगी रुग्णालयात दाखल करण्यात आले.
घटनेची माहिती मिळताच पोलिसांनी तपासाची चक्रे वेगाने फिरवत एका संशयिताला ताब्यात घेतले. दुसरा आरोपी मात्र फरार झाला असून त्याचा शोध सुरू आहे. परिसरातील सीसीटीव्ही फुटेज तसेच अन्य पुराव्यांच्या आधारे पोलिस तपास करत आहेत.
दरम्यान, राजगड पोलिस ठाण्याचे पोलिस निरीक्षक संतोष जाधव यांनी रुग्णालयात जाऊन जखमी पोलिस हवालदार प्रशांत राऊत यांची भेट घेत त्यांच्या प्रकृतीची विचारपूस केली. तसेच या घटनेतील आरोपींवर कठोर कारवाई करण्यात येईल, असे आश्वासन दिल्याची माहिती मिळाली आहे.
