वेल्हे, ता. १४ : राजगड तालुक्यातील मालवली येथे किरकोळ वादातून १८ वर्षीय युवकाचा मृत्यू झाल्याची धक्कादायक घटना रविवारी दुपारी घडली. या प्रकरणी वेल्हे पोलिसांनी १५ वर्षे १० महिने वयाच्या विधिसंघर्षित बालकाविरुद्ध खुनाचा गुन्हा दाखल करून त्याला ताब्यात घेतले आहे.
विकास सुरेश जाधव (वय १८, रा. मालवली, ता. राजगड) असे मृत युवकाचे नाव आहे. याप्रकरणी रोहन पांडुरंग पवार (वय २३) यांनी वेल्हे पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, मालवली येथील राजतोरण शाळेच्या मैदानाजवळ रविवारी दुपारी काही युवकांमध्ये किरकोळ कारणावरून वाद झाला होता. उपस्थितांनी मध्यस्थी करून हा वाद मिटवला. त्यानंतर सर्वजण तेथून निघून गेले. मात्र, काही अंतरावर गेल्यानंतर आरोपीने पुन्हा मैदानाजवळ जाण्याचा आग्रह धरला.
मैदान परिसरात परत आल्यानंतर विकास जाधव आणि आरोपी यांच्यात पुन्हा शाब्दिक बाचाबाची झाली. या वादाचे रूपांतर हाणामारीत झाले. त्यावेळी आरोपीने विकासचा गळा दाबल्याचा आरोप फिर्यादीत करण्यात आला आहे. घटनास्थळी उपस्थित असलेल्या काही जणांनी दोघांना वेगळे केले. मात्र, त्यानंतर विकासची प्रकृती बिघडली. तो प्रतिसाद देत नसल्याचे लक्षात आल्यानंतर त्याला तातडीने वेल्हे ग्रामीण रुग्णालयात दाखल करण्यात आले.
रुग्णालयातील वैद्यकीय अधिकाऱ्यांनी तपासणी करून विकासला मृत घोषित केले. घटनेची माहिती मिळताच वेल्हे पोलिसांनी घटनास्थळी धाव घेत तपास सुरू केला. फॉरेन्सिक पथकाने घटनास्थळी भेट देऊन पुरावे संकलित केले आहेत.
या घटनेमुळे मालवली परिसरात हळहळ व्यक्त होत असून युवकाच्या मृत्यूने गावावर शोककळा पसरली आहे. आरोपी विधिसंघर्षित बालकाला पोलिसांनी ताब्यात घेतले असून मृतदेहाचे शवविच्छेदन व इतर कायदेशीर प्रक्रिया सुरू आहेत. सहाय्यक पोलीस निरीक्षक किशोर शेवते यांच्या मार्गदर्शनाखाली पुढील तपास सुरू आहे.
