नसरापूर, दि. १५ : खेड शिवापूर टोल नाक्याजवळ कर्तव्य बजावत असलेल्या राजगड पोलिस ठाण्यातील पोलिस शिपाई प्रशांत ज्ञानेश्वर राऊत यांच्यावर दोन तरुणांनी हल्ला केल्याची गंभीर घटना रविवारी (दि. १४) रात्री घडली. या प्रकरणी राजगड पोलिसांनी दोघांविरुद्ध गुन्हा दाखल केला असून एका आरोपीला अटक करण्यात आली आहे, तर दुसरा आरोपी फरार असून त्याचा शोध सुरू आहे.
पोलिसांनी दिलेल्या माहितीनुसार, प्रशांत राऊत हे खेड शिवापूर टोल नाक्यापुढील सर्व्हिस रोड परिसरात वाहतूक नियमन व बंदोबस्ताची जबाबदारी पार पाडत होते. रात्री सुमारे ८.४५ वाजण्याच्या सुमारास दोन युवक रस्त्यावर उभे राहून आरडाओरडा, शिवीगाळ आणि गोंधळ घालत असल्याचे त्यांच्या निदर्शनास आले. सार्वजनिक शांतता भंग होऊ नये म्हणून राऊत यांनी संबंधितांना समजावून सांगत रस्त्यावर गोंधळ न घालण्याची सूचना केली.
मात्र, पोलिसांनी समज दिल्याचा राग मनात धरून आरोपी अनिकेत राजेंद्र लांडे (वय २४, रा. तांभाड, ता. भोर) याने पोलिस शिपाई राऊत यांना शिवीगाळ करत धक्काबुक्की केली. त्यानंतर त्यांच्या गणवेशाची गचांडी धरून गणवेशावरील बटणे तोडली. एवढ्यावरच न थांबता त्याने हातातील चावीने राऊत यांच्या हनुवटीवर वार करून दुखापत केल्याचे फिर्यादीत नमूद करण्यात आले आहे.
दरम्यान, दुसरा आरोपी शुभम शिंदे (रा. इंदिरानगर, हिंगणे, पुणे) याने मागून येत राऊत यांच्या डोक्याच्या मागील बाजूस विटेने मारहाण केली. या हल्ल्यात राऊत जखमी झाले असून त्यांच्या शासकीय कर्तव्यात अडथळा निर्माण झाल्याचे पोलिसांनी सांगितले.
घटनेनंतर जखमी राऊत यांना तातडीने उपचारासाठी रुग्णालयात दाखल करण्यात आले. राजगड पोलिसांनी त्वरित कारवाई करत अनिकेत लांडे याला अटक केली, तर शुभम शिंदे हा फरार झाला. त्याचा शोध घेण्यासाठी पोलिसांचे पथक रवाना करण्यात आले असून परिसरातील सीसीटीव्ही फुटेज व अन्य पुराव्यांच्या आधारे तपास सुरू आहे.
दरम्यान, राजगड पोलिस ठाण्याचे पोलिस निरीक्षक संतोष जाधव यांनी रुग्णालयात भेट देऊन जखमी पोलिस शिपाई प्रशांत राऊत यांच्या प्रकृतीची विचारपूस केली. या प्रकरणातील आरोपींवर कठोर कारवाई करण्यात येणार असल्याचे त्यांनी सांगितले. पुढील तपास राजगड पोलिस ठाणे करीत आहे.
