सातारा: येथील अदालत वाड्याशेजारी असलेल्या माची पेठेतील सर्व्हिसिंग सेंटरच्या शेजारी असलेल्या एका दुकानातील कॉम्प्रेसरचा भीषण स्फोट झाला असून, या स्फोटामध्ये एक मृत्यृमुखी पडला आहे तर दोन जण गंभीर जखमी झाला असल्याची घटना आज दुपारी २ वाजण्याच्या सुमारास घडली आहे. शाहूपुरी आणि सातारा शहर पोलिसांना या स्फोटाची माहिती मिळाल्यानंतर, पोलीस तातडीने घटनास्थळी दाखल झाले. जखमी दोघांना रुग्णालयात हलविण्यात आले.
हा स्फोट नेमका कशामुळे झाला, हे जाणून घेण्यासाठी सातारकरांनीही घटनास्थळी प्रचंड गर्दी केली होती. समर्थ मंदिरहून पोवई नाक्याकडे जाणारा रस्ता पोलिसांनी दोन्ही बाजूने बंद केला होता. घटनास्थळी बॉम्ब स्कॉड व श्वान पथकाच्या वतीने तपासणी करण्यात आली. या दुर्घटनेत मुनीर पालकर (वय ३५, रा. गुरुवार परज, सातारा) असे या भीषण स्फोटात मृत्यूमुखी पडलेल्याचे नाव आहे. तर हारुण बागवान आणि उमर बागवान (रा. सातारा) अशी गंभीररित्या जखमी झालेल्यांची नावे आहेत. या दोघांवर साताऱ्यातील येथील खासगी रुग्णालयात उपचार सुरू आहेत.
शार्टसर्किट होऊन झाला स्फोट
मिळालेल्या माहितीनुसार, साताऱ्यातील अदालत वाड्याशेजारी माची पेठ आहे. या पेठेमध्ये रस्त्याला लागूनच सर्व्हिसिंग सेंटर आणि एक दुकान आहे. या दुकानामध्ये मुनीर पालकर आणि हारुण तसेच उमर हे तिघे बसले होते. त्यावेळी अचानक शाॅर्टसर्किट होऊन या दुकानातील कॉम्प्रेसरचा भीषण स्फोट झाला. हा स्फोट इतका भयानक होता की, मुनीर पालकर हा तब्बल तीस फूट हवेत उडून डांबरी रस्त्यावर पडला. या घटनेत त्याचा जागीच मृत्यू झाला. इतर दोघे दुकानाच्या शेजारीच रक्तबंबाळ अवस्थेत पडले होते. या स्फोटाच्या आवाजाने संपूर्ण सातारा शहर हादरून गेले आहे.
एकापाठोपाठ दोन स्फोट?
काही प्रत्यक्षदर्शींचे म्हणणे आहे, या ठिकाणी एकापाठोपाठ दोन स्फोट झाले. हवेत मोठ्या प्रमाणात पांढऱ्या रंगाचा धूर दिसत होता. या स्फोटामुळे आजूबाजूच्या इमारतींच्या खिडक्यांच्या काचाही फुटल्या.
