नसरापूर | प्रतिनिधी : पुणे जिल्ह्यातील भोर तालुक्यातील कापुरहोळ गावात घडलेल्या थरारक गोळीबार प्रकरणी अखेर राजगड पोलीस ठाण्यात गुन्हा दाखल करण्यात आला आहे. या प्रकरणात राजगड न्यूजच्या सातत्यपूर्ण पत्रकारितेचा लक्षणीय ठसा उमटला असून स्थानिक प्रशासनाला कारवाईस प्रवृत्त करण्यास भाग पाडले. त्यानुसार राजगड पोलिसांनी संशयित आरोपी अनुज दत्तात्रय झेंडे (वय 20, रा. दिवे, ता. पुरंदर) याच्यावर गुन्हा दाखल करत अटक केली आहे.
पोलिसांनी दिलेल्या माहितीनुसार, मंगळवार, 4 जून 2025 रोजी सायंकाळी सुमारे 5 वाजण्याच्या सुमारास घडली. आरोपी झेंडे हा आपल्या बुलेट (MH 12 QL 0094) मोटारसायकलवरून कापुरहोळ चौकात मोठ्या आवाजात वर्दळ करत फिरत होता. त्यावेळी त्याने आपल्या ताब्यातील पिस्टलमधून अचानक हवेत गोळीबार केला. अचानक झालेल्या गोळीबारामुळे परिसरात एकच खळबळ माजली. अनेक व्यापारी आपली दुकाने बंद करत असतानाच सामान्य नागरिकांमध्ये भीतीचे वातावरण निर्माण झाले.
गोळीबार केल्यानंतर आरोपी झेंडे हा मोटारसायकलवरून नारायणपूरच्या दिशेने निघाला. मात्र, तो त्या वेळी दारूच्या नशेत होता आणि वाहनावरचे नियंत्रण सुटल्यामुळे त्याचा अपघात झाला. अपघातात तो जखमी झाला असतानाच परिसरातील सजग नागरिक गणेश सुनिल लोहार आणि ऋतिक मारुती लोहार यांनी प्रसंगावधान राखत त्याला ताब्यात घेतले आणि राजगड पोलीस स्टेशनमध्ये सुपूर्त केले.
या प्रकरणी पोलीस कॉन्स्टेबल अभिजीत छगन इंगळे यांनी फिर्याद दिली आहे. पोलिसांनी आरोपीकडून एक सिल्व्हर रंगाची, लाकडी मुठ असलेली अंदाजे ₹5,000 किमतीची पिस्टल जप्त केली आहे. या प्रकरणी पोलिस निरीक्षक पवार यांच्या मार्गदर्शनाखाली सहाय्यक पोलीस निरीक्षक राठोड पुढील तपास करीत आहेत.
घटनेनंतर सुरुवातीला पोलिसांकडून काहीसे दुर्लक्ष झाल्याचे चित्र होते. स्थानिकांनी व्यक्त केलेल्या नाराजीमुळे आणि सोशल मीडियावर प्रखर प्रतिक्रिया उमटल्यामुळे पोलिस प्रशासनावर ताण वाढत गेला. याच दरम्यान राजगड न्यूजने या घटनेचा सातत्याने पाठपुरावा करत प्रशासनाच्या भूमिकेवर प्रश्नचिन्ह उपस्थित केले. शेवटी प्रशासनाला कारवाई करण्याशिवाय पर्याय राहिला नाही आणि आरोपीविरुद्ध गुन्हा दाखल करण्यात आला.
