शिरवळ: गेल्या काही वर्षांपासून स्थानिक स्वराज्य संस्थांच्या निवडणुका झालेल्या नाहीत. यामुळे खंडाळा तालुक्यात जिल्हा परिषदेच्या बांधकाम विभागामार्फत होणाऱ्या कामांच्या गुणत्तेवर प्रश्न उपस्थित करण्यात येत आहे. काम करणाऱ्या अधिकाऱ्यांवर कोणाचेच नियंत्रण न राहिल्याने विविध विकास कामांची गुणवत्ता ढासळली असून दर्जाहीन कामे केली जात आहेत. तसेच शासनाच्या पैशांचा विनियोग योग्य पद्धतीने होण गरजेचे असताना तसे होताना दिसत नसून कामांच्या गुणवत्तेची आणि संबंधित काम करणाऱ्या अधिकाऱ्यांच्या मालमत्तेची चौकशी करण्याची मागणी भाजपचे जिल्हा उपाध्यक्ष चंद्रकांत यादव यांनी केली आहे.
शासनाच्या निधीमधून खंडाळा तालुक्यातील गावागावात सभा मंडप, अंतर्गत रस्ते कॉक्रटिकरण, गटारे व रस्त्यांच्या करोडो रुपयांचा निधी उपलब्ध करून देत आहे. यामधील बहुतांश कामे जिल्हा परिषद बांधकाम विभागाकडून होत आहेत. सद्यस्थितीत स्थानिक स्वराज्य संस्थाचा कारभार प्रशासकाकडे असल्याने या अधिकाऱ्यांचे चांगलेच फावले आहे. निकृष्ठ व दर्जाहिन काम करीत केवळ टक्केवारी गोळा करण्यात खंडाळयाच्या अभियंत्यांनी धन्यता मानली असल्याचा गंभीर स्वरुपाचा आरोप यादव यांनी केला आहे.
अधिकाऱ्याच्या तोंडाला काळे फासणारः यादव यांचा इशारा
तालुक्यात जिल्हा परिषद बांधकाम विभागाच्या अधिकाऱ्यांनी टक्केवारीत शासनाच्या निधीची वाट लावली आहे. त्यामुळे झालेल्या कामांची तपासणी क्वॉलिटी कंट्रोलकडून करावी म्हणजे अधिकाऱ्यांचे हात डांबरात किती काळे झाले आहेत, हे जनतेसमोर येईल. याच बरोबर या अधिकाऱ्यांनी कमविलेली काळी माया यांच्या मालमत्तेची चौकशी झाल्यावरच कळेल म्हणून ही तपासणी व चौकशी झालीच पाहिजे, अशी आग्रही मागणी यादव यांनी केली आहे. भ्रष्ट अधिकाऱ्यांना राजकीय अभय मिळत असेल तसेच जनेतेच्या पैशाने अधिकाऱ्यांनी आपली घर भरण्याचे काम सुरूच ठेवले तर आगामी काळात ज्या ठिकाणी अशी निकृष्ठ कामे केली जाते आहेत, त्या ठिकाणी जाऊन संबंधित अधिकाऱ्याच्या तोंडाला काळे फासणार असल्याचा इशारा यादव यांनी दिला आहे.
