धायरी: पुणे जिल्हा माध्यमिक व उच्च माध्यमिक शाळा मुख्याध्यापक संघाच्या वतीने ‘जिल्हास्तरीय गुणवंत शिक्षक पुरस्कार’ रयत शिक्षण संस्थेच्या नारायणराव सणस विद्यालयातील उपशिक्षक सचिन दिनकर कापरे यांना देण्यात आला. शिक्षण आणि सामाजिक क्षेत्रात उल्लेखनीय कार्य केल्याबद्दल त्यांना या पुरस्काराने सन्मानित करण्यात आले. दैनिक लोकमतचे संपादक संजय आवटे तसेच पुणे जिल्ह्याचे माध्यमिक शिक्षण विभागाचे शिक्षणाधिकारी भाऊसाहेब कारेकर यांच्या हस्ते हा पुरस्कार कापरे यांना देण्यात आला. यावेळी कापरे यांच्या पत्नी रोहिणी कापरे यांचा देखील सन्मान करण्यात आला.
यावेळी आमदार महेश लांडगे, माजी शिक्षक आमदार भगवान साळुंखे, मुख्याध्यापक संघाचे अध्यक्ष नंदकुमार सागर, सचिव प्रसाद गायकवाड, सणस विद्यालयाच्या मुख्याध्यापिका सुवर्णा परदेशी उपस्थित होते. रयत शिक्षण संस्थेच्या जनरल बॉडी सदस्या विभावरी सणस, पश्चिम विभागाचे विभागीय अधिकारी संजय मोहिते, विद्यालयातील सर्व शिक्षक, शिक्षकेतर कर्मचारी आणि विद्यार्थ्यांनी सचिन कापरे यांचे अभिनंदन केले.
सचिन कापरे यांच्याविषयी…..
सचिन कापरे हे भांबवडे, तालुका भोर या छोट्याशा गावातील रहिवाशी आहेत. त्यांचे शिक्षण एम. ए., डी. एड.,बी. एड.,डी. एस. एम. झाले आहे. रयत शिक्षण संस्थेत गेली २३ वर्षे ते नोकरी करत आहेत. तसेच ते महाराष्ट्र माध्यमिक डी एड शिक्षक महासंघ, आधार सोशल ट्रस्टचे सदस्य आहेत. तसेच ओपश सोशिओ कमर्शियल प्रायव्हेट लिमिटेड आणि सलाम बॉम्बे फाउंडेशनचे समन्वयक म्हणून देखील ते काम करीत आहेत.
शैक्षणिक कार्यासाठी मदत
पाचवी शिष्यवृत्ती, आठवी शिष्यवृत्ती, आठवी एन एम एम एस, पाचवी नवोदय, रयत प्रज्ञाशोध अशा विविध शिष्यवृत्ती विभागात त्यांचे एकूण २७ विद्यार्थी शिष्यवृत्तीधारक झाले आहेत. नवीन इमारतीच्या बांधकामासाठी त्यांनी लोकांमधून ३ लाख ७४ हजार ५०० रुपये देणगी जमा केली आहे. ३८ विद्यार्थ्यांना २ लाख ३१ हजार ५६२ रुपये बाह्य शिष्यवृत्ती मिळवून दिली आहे. ६ विद्यार्थ्यांना कॅनरा बँकेकडून २४ हजारपर्यंची शिष्यवृत्ती मिळवून दिली आहे. शैक्षणिक वर्ष २०१४-१५ मध्ये कोणत्याही प्रकारची रजा त्यांनी घेतलेली नाही.