नसरापूर | प्रतिनिधी : भोर तालुक्यातील कापूरहोळ चौकात भर गर्दीत बुलेटच्या सायलेन्सरमधून आवाज करत व पिस्तुल डोक्याला लावत हवेत गोळीबार करणाऱ्या अनुज दत्तात्रय शिंदे (वय २०, रा. दिवे, ता. पुरंदर) याच्यावर अखेर गुन्हा दाखल झाला आहे. राजगड न्यूजने उघड केलेल्या बातमीमुळे पोलिसांचा गुन्हा दडपण्याचा प्रयत्न फसला असून, तब्बल २४ तासांनंतर पोलिसांनी गुन्हा नोंदवला आहे.
पोलिसांकडून आणि घटनास्थळावरून मिळालेल्या माहितीनुसार ,बुधवार, ४ जून रोजी सायंकाळी साडेपाचच्या सुमारास कापुरव्होळच्या मुख्य चौकात ही घडली. आरोपी अनुज शिंदे याने आपल्या बुलेट (MH 12 QN 0094) या गाडीच्या सायलेन्सरमधून मोठा आवाज करत चौकात दहशत निर्माण केली. सुमारे १५ मिनिटे तो आवाज करत राहिला. यामुळे संतप्त नागरिकांनी त्याला समज देण्याचा प्रयत्न केला. मात्र रागाच्या भरात आरोपीने एका युवकाच्या डोक्यावर पिस्तुल ठेवले आणि त्यानंतर हवेत दोन गोळ्या झाडल्या.
ही घटना अतिशय भयावह असून, त्यानंतर आरोपी बुलेटवरून नारायणपूर-सासवड मार्गे पळून गेला. घटनास्थळी गोंधळ उडाला होता. मात्र, धाडसी स्थानिक युवक गणेश लोहार आणि ऋषिकेश लोहार यांनी त्याचा पाठलाग करत त्याला पकडून पोलिसांच्या स्वाधीन केलं.
या प्रकरणात महत्त्वाचं म्हणजे पोलिसांनी घटनास्थळी उपस्थित असूनही तात्काळ गुन्हा दाखल न करता हे प्रकरण मिटवण्याचा प्रयत्न केल्याची जोरदार चर्चा होती. पोलिसांच्या हलगर्जीपणामुळे नागरिकांमध्ये संतापाची लाट होती.
मात्र, राजगड न्यूजने सातत्याने या घटनेचं वार्तांकन करत पोलिसांवर दबाव आणला. पत्रकारितेच्या या जबाबदारीमुळे अखेर पोलिसांनी गुन्हा दाखल केला.
राजगड पोलीस स्टेशनमध्ये भारतीय हत्यार कायदा कलम 3 (25) अंतर्गत गुन्हा दाखल करण्यात आला असून पुढील तपास सुरु आहे. पोलिसांचा सुरुवातीचा ‘दडपाशाही’चा प्लॅन अपयशी ठरवून पत्रकारितेने पुन्हा एकदा लोकशाहीचं बळ दाखवून दिलं आहे.
गोळीबार प्रकरण दडपण्यास तो पोलिस कर्मचारी आग्रही का?
