शिरवळ पोलिस ठाण्यातील मारहाणीमुळे तरुणाची आत्महत्या; कुटुंबीय आक्रमक
शिरवळ (ता. खंडाळा) – भोर तालुक्यातील न्हावी येथील एका तरुणाने पोलिसांच्या मारहाणीमुळे आत्महत्या केल्याची धक्कादायक घटना घडली आहे. अजय तुकाराम शिंदे (वय २२, रा. न्हावी) असे आत्महत्या केलेल्या तरुणाचे नाव असून, कुटुंबीयांनी शिरवळ पोलिसांवर गंभीर आरोप केले आहेत. मारहाण करणारे पोलीस कोण होते, याबाबत आता चौकशीची मागणी होत आहे.
घटना कशी घडली? शिरवळ एमआयडीसी परिसरात पूर्ववैमनस्यातून झालेल्या वादाचे पर्यवसान निर्घृण हत्येत झाले. बुधवारी रात्री ११:३० वाजता एका कंपनीच्या गेटजवळ अमर शांताराम कोंढाळकर (वय २२, रा. वडवाडी, ता. खंडाळा) याची तलवारीने वार करून हत्या करण्यात आली. या प्रकरणी तेजस महेंद्र निगडे (वय १९, रा. गुणंद, ता. भोर) याला शिरवळ पोलिसांनी अटक केली होती. या घटनेचा तपास पोलिस निरीक्षक संदीप जगताप करत आहेत.
चौकशीच्या नावाखाली अमानुष मारहाण या हत्येच्या चौकशीदरम्यान, आरोपीसोबत कंपनीत काम करणाऱ्या इतर तरुणांची देखील चौकशी केली जात होती. त्यात अजय तुकाराम शिंदे यालाही पोलिसांनी चौकशीसाठी बोलावले होते. सोमवारी (दि. १७) अजय आपल्या कुटुंबासोबत शिरवळ पोलिस ठाण्यात हजर झाला. मात्र, पोलिसांनी त्याला चौकशीसाठी ताब्यात घेत जबर मारहाण केली. या मारहाणीत तपासी अधिकाऱ्यांसह दोन पोलिस हवालदार आणि एक पोलिस शिपाई सामील असल्याचे कुटुंबीयांनी सांगितले.
मारहाणीमुळे अजयच्या शरीरावर गंभीर दुखापती झाल्या होत्या. त्याचे हात-पाय सुजले होते आणि पोलिसांनी कोणत्या प्रकारे मारहाण केली, हे देखील अजयने कुटुंबियांना सांगितले होते. या भीतीमुळे अजयने आपल्या राहत्या घरी गळफास लावून आत्महत्या केली.
कुटुंबीयांचा पोलिसांवर गंभीर आरोप या घटनेनंतर कुटुंबीय आक्रमक झाले असून, पोलिसांच्या मारहाणीमुळेच अजयने आत्महत्या केल्याचा आरोप त्यांनी केला आहे. “जर आमचा मुलगा दोषी होता तर त्याला अटक करायला हवे होते. चौकशीसाठी बोलावून त्याला अमानुष मारहाण का केली?” असा सवाल कुटुंबीय विचारत आहेत. या प्रकरणातील संबंधित पोलिस अधिकाऱ्यांवर कठोर कारवाई करण्याची मागणीही त्यांनी केली आहे.
पोलिसांवर कारवाई होणार की प्रकरण दडपले जाणार? या प्रकरणावर वरिष्ठ पोलीस अधिकारी कोणती भूमिका घेणार, दोषी पोलिसांवर कठोर कारवाई होणार की प्रकरण दडपले जाणार, हे पाहणे महत्त्वाचे ठरणार आहे. कुटुंबीय व ग्रामस्थांनी न्यायाच्या प्रतीक्षेत असून, याबाबत आता पोलिसांच्या वरिष्ठ अधिकाऱ्यांकडून काय निर्णय घेतला जातो, हे लवकरच स्पष्ट होईल.
