मतदानाची टक्केवारी वाढविण्यासाठी प्रयत्न
भोर -देशाच्या हितासाठी व विकासासाठी मतदान करणे आवश्यक आहे. मतदार हा राजा आहे. लोकशाहीच्या बळकटीकरणासाठी मतदारांनी निवडणूकीत मतदानाचा पवित्र हक्क बजावला पाहिजे. मतदान हे आपले राष्ट्रीय कर्तव्य असुन, मतदान हा प्रत्येक नागरिकाचा महत्वाचा अधिकार आहे. त्यामुळे मिळालेल्या या अधिकाराचा वापर प्रत्येक भारतीय नागरिकाने करावा आणि मतदानाचे कर्तव्य पार पाडावे याच पार्श्वभूमीवर आगामी लोकसभा निवडणुकीत मतदानाचे महत्व अधोरेखित करण्यासाठी व मतदारांच्या मतदान जागरूकतेला चालना देण्यासाठी सहाय्यक निवडणूक निर्णय अधिकारी तथा उपविभागीय अधिकारी राजेंद्र कचरे आणि तहसिलदार सचिन पाटील यांच्या मार्गदर्शनाखाली भोर तालुक्यातील बालवडीतील मतदान केंद्रस्तरीय अधिकारी भिमराव शिंदे यांनी शालेय विद्यार्थ्यांसमवेत बैलगाडीतून मतदान जागृतीचे फलक लावुन गावातून मिरवणूक काढली. ” मतदार राजा जागा हो लोकशाहीचा धागा हो, आपल्या मताने बदल घडेल देश प्रगतीची पायरी चढेल, निर्भय होऊन मतदान करा अधिकाराचा सन्मान करा, मतदानासाठी वेळ काढा आपली जबाबदारी पार पाडा. ” अशा आशयाचे फलक लावून जनजागृती केलीमतदानाची टक्केवारी वाढावी यासाठी अनोख्या पध्दतीने मतदान जागृती केली. यावेळी शाळेचे मुख्याध्यापक भिमराव शिंदे,प्रा.महादेव बदक ,आनंदा सावले ,अंजना कोंढाळकर आणि विद्यार्थी या मोहिमेत सहभागी होते.
