पुणेः हडपसरच्या मांजरी येथील शाळेत एक धक्कादायक घटना घडली आहे. एका शाळेकरी मुलाने काही कारणांवरून झालेल्या वादातून त्याच शाळेत शिकणाऱ्या इयत्ता नववीच्या विद्यार्थ्याच्या गळ्यावर काचेच्या तुकड्याने वार केले. या घटनेत वार करण्यात आलेला मुलगा गंभीर जखमी झाला असल्याची माहिती मिळत आहे. या प्रकरणी हडपसर पोलिसांनी अल्पवयीन मुलावर (वय १४) गुन्हा दाखल केला आहे. या घटनेमुळे येथील परिसरात एकच खळबळ उडाली आहे.
मिळालेल्या माहितीनुसार, मांजरी येथील एका शाळेत वार्षिक स्नेहसमारंभावरून त्याचा व अन्य एका विद्यार्थ्याचा शाब्दिक वाद झाला होता. फिर्यादी मुलगा दुपारच्या वेळी वर्गात होता, त्यावेळी त्याच्या पाठीमागून आलेल्या १४ वर्षीय अल्पवयीन मुलाने काचेच्या तुकड्याने त्याच्या गळा चिरला. तसेच यावेळी या मुलाने पीडित मुलाला तुझी विकेट पाडीन अशी धमकी देखील दिली असल्याचे सांगितले जात आहे.
घटनेची माहिती मिळताच शाळेतील कर्मचाऱ्यांनी गंभीर अवस्थेत असलेल्या पीडित मुलाला रुग्णालयात दाखल केले आहे. सदर घटना ही दि. १९ नोव्हेंबर रोजी घडली असल्याची माहिती पोलिसांनी दिली आहे. या प्रकरणाचा पुढील तपास सहाय्यक पोलीस निरीक्षक दादासाहेब रोकडे हे करीत आहेत.
