गेली पंधरा वर्षांपासून ध्रुव प्रतिष्ठानचे अध्यक्ष राजीव केळकर राबवत आहेत हा अनोखा उपक्रम
भोर – तालुक्यातील पश्चिम पट्ट्यात असलेल्या दुर्गम व डोंगरी भागात अनेक गरीब व आदिवासी कुटुंब राहतात . या कुटुंबांची आर्थिक परिस्थिती हालाखीची व यांचे हातावरचे पोट असल्याने अशा सर्व २०० कुटुंबामध्ये दिवाळी किराणा साहित्याचे किट वाटप त्यांच्या घरी जाऊन ध्रुव प्रतिष्ठानचे अध्यक्ष राजीव केळकर यांनी नुकतेच केले . पंधरा-सोळा वर्षापासून ध्रुव प्रतिष्ठान गरीब व गरजू कुटुंबांसाठी हा उपक्रम राबवत आहे.
सदरच्या दिवाळी साहित्यामध्ये ध्रुव प्रतिष्ठानच्या माध्यमातून कार्यशाळेत विद्यार्थ्यांनी तयार केलेल्या पणत्या, आकाश कंदील, तसेच रवा, चिवडा मसाला, बेसन पीठ, साखर, भाजके पोहे, तेल तूप, मोतीसाबण , सुगंधी उटणे, सुवासिक तेल बाटली, काजू, बदाम, बेदाणा, शेंगदाणे इत्यादी प्रकारचे साहित्य होते. टिटेघर -वडतुंबी , म्हाकोशी, अंबवडे, नाझरे झुलता पूल, नाटंबी, भोर मांढरदेवी रस्त्यावरील आदिवासी कातकरी वस्ती अशा ठिकाणी या दिवाळी किराणा साहित्य किटचे वाटप करण्यात आले.
रात्र अभ्यासिका सुरू करणार
विद्यार्थ्यांना आकाश कंदील करण्यासाठी मनीषा केळकर व राजीव केळकर यांनी मार्गदर्शन केले. तसेच साहित्य वाटण्यासाठी योगीराज केळकर, राहुल खोपडे, प्रीतम शिंदे, श्रेयस नवघणे, आदित्य नवघणे यांचे सहकारी मिळाले. भविष्यामध्ये प्रत्येक आदिवासी वस्तीवर आधुनिक रात्र अभ्यासिका चालू करणार असल्याचे ध्रुव प्रतिष्ठानचे संस्थापक -अध्यक्ष राजीव केळकर यांनी सांगितले.
मागील पंधरा वर्षांपासून आमची दिवाळी गोड ध्रुव प्रतिष्ठानचे अध्यक्ष राजीव केळकर यांच्यामुळे आमच्या आंबवडे खो-यातील गोर गरीब आदिवासी कुटुंबांची दिवाळी गेल्या पंधरा वर्षापासून गोड होत असते अशी प्रतिक्रिया आंबवडे रस्त्यावरील आदिवासी वस्तीतील विजय मुकणे यांनी दिली.
