बारामतीः प्रतिनिधी सनी पटेल
दि. २८ अॅागस्ट रोजी सुपे उपबाजार येथील लिलावात लिंबास प्रति किलो ९२ रुपये एवढा उच्चांकी दर मिळाला असून किमान प्रति किलो ६५ रुपये व सरासरी प्रति किलो दर ८० रुपये निघाला आहे. तसेच जळोची उपबाजार येथील भाजी मार्केटमध्ये बुधवार दि. २८ ऑगस्ट रोजी कांद्याला प्रति क्किंटल कमाल दर ४ हजार ६०० तर सरासरी ३ हजार ४५० असा निघाला होता.
बारामती पासून पुणे शहर जवळ असल्याने लिंबास मोठ्या प्रमाणात मागणी असते. तसेच लिंबू खरेदीसाठी बाहेरील खरेदीदार या ठिकाणी येत असतात. परपेठेत लिंबू व काद्यांस मोठी मागणी असल्याने आणि आवक कमी होत असल्याने उच्चांकी दर निघत आहेत, अशी माहिती सभापती सुनिल पवार व उपसभापती निलेश लडकत यांनी दिली.
सुपे उपबाजार येथे दर बुधवारी लिंबूचा लिलाव करण्यात येतो. बारामती तालुक्यासह दौंड, पुरंदर या भागातील शेतकरी देखील लिंबू विक्रीस या ठिकाणी घेऊन येत असतात. लिंबू व कांद्यास स्थानिक बाजारपेठेत किरकोळ विक्रीसाठी आणि परपेठेत मागणी वाढत असल्याने आणखी दर वाढतील असे देखील सध्याचे चित्र सांगत आहे.
परंतू, चांगल्या मालास उच्च दर मिळत असल्याने लिंबू व कांदा उत्पादक शेतक-यांनी आपला माल ग्रेडींग व सॉर्टींग करून आणावा म्हणजे आणखी जास्त दर मिळतील. समितीच्या बाजार आवारात शेतमालाचे अचूक माप, लिलावापूर्वी गोणीचे वजन व त्याच दिवशी पट्टी तसेच उघड लिलाव पद्धतीने विक्री व समितीचे नियंत्रण यामुळेच शेतक-यांचा आर्थिक फायदा होत आहे, अशी माहिती सचिव अरविंद जगताप यांनी दिली. शेतक-यांनी आपला माल बारामती बाजार समितीचे आवारात विक्रीस आणावा, असे आवाहन समिती तर्फे करण्यात येत आहे.
