इंदापूरः राष्ट्रीय सहकारी साखर कारखाना महासंघाचे अध्यक्ष, मा. मंत्री हर्षवर्धन पाटील यांच्या वाढदिवसानिमित्त जिजाऊ फेडरेशनने दि. १६ ऑगस्ट रोजी बेरोजगार युवकांसाठी नोकरी महोत्सवाचे आयोजन केले होते. या नोकरी महोत्सवामध्ये ७७ कंपन्यांनी ३४१ युवकांना प्रत्यक्ष नियुक्तीपत्र देऊन त्यांना रोजगाराची संधी उपलब्ध करून दिली आहे.आज सकाळी ८ वाजता हर्षवर्धन पाटील यांच्या हस्ते या नोकरी महोत्सवाचे उद्घाटन होऊन प्रत्यक्षात मुलाखतीस सुरुवात झाली. यावेळी युवा नेते राजवर्धन पाटील, अंकिता पाटील ठाकरे तसेच मान्यवर आणि युवक मोठ्या संख्येने उपस्थित होते. दिवसभर मोठ्या संख्येने युवकांचा या मेळाव्यास मोठा प्रतिसाद लाभला होता.
पुणे जिल्हा भाजप युवा मोर्चाच्या जिल्हाध्यक्षा अंकिता पाटील (ठाकरे) यांच्या संकल्पनेतून इंदापूर तालुक्यातील हुशार, गरजू कौशल्याधिष्ठित युवकांना नोकरीची संधी उपलब्ध व्हावी, यासाठी इंदापूरमध्ये नोकरी महोत्सवाचे आयोजन करण्यात आले होते. या नोकरी महोत्सवासाठी १२१० युवकांनी ऑनलाइन रजिस्टरद्वारे नोंदणी केली होती. विविध क्षेत्रातील ७७ कंपन्या या नोकरी महोत्सवात सहभागी झाल्या होत्या. ७९६ युवकांनी प्रत्यक्ष नोकरीसाठी मुलाखत दिली, तर त्यापैकी ३४१ युवकांना कंपन्यांनी थेट नियुक्तीपत्र देऊन त्यांना रोजगार उपलब्ध करून दिला आहे. हर्षवर्धन पाटील यांनी निवड झालेल्या सर्व विद्यार्थ्यांचे अभिनंदन केले. तसेच त्यांना पुढील वाटचालीसाठी शुभेच्छा दिल्या.
