इंदापूरः तालुक्यातील लांमजेवाडीजवळ चार चाकी वाहनाचा भीषण अपघात होऊन या अपघातात दोन शिकाऊ वैमानिकांचा मृत्यू झाला असून दोन पायलट गंभीर जखमी झाले आहेत. सोमवारी पहाटे तीन वाजण्याच्या सुमारास ही घटना घडली. चारचाकी वाहनातून हे चौघेजण बारामतीहून भिगवणच्या दिशने निघाले होते. यावेळी लामजेवाडी गावाजवळ भरधाव कारवरील चालकाचे नियंत्रण सुटल्याने चारचाकी वाहन रस्त्याच्या बाजूला असलेल्या झाडाला जाऊन धडकून बारामती एमआयडीसी ला पाणी पुरवठा करणाऱ्या पाईप लाईनवर पलटी झाली.
मिळालेल्या माहितीनुसार, बारामतीकडून भिगवणकडे निघालेल्या बारामतीतील चार शिकाऊ पायलटच्या चार चाकी वाहनाला भीषण अपघात झाला. कृष्णा मंगल सिंग हा गाडी चालवत होता. या दुर्घटनेत दोन शिकाऊ पायलटचा जागीच मृत्यू झाला असून आणखी दोघेजण गंभीर जखमी झाले आहेत. त्यातील एकाची प्रकृती अत्यवस्थ असल्याची माहिती मिळत आहे. दशु शर्मा (वय 21) आणि आदित्य कणसे (वय 29) अशी मृतांची नांवे आहेत. तर कृष्णा मंगलसिंग (वय 21) व महिला पायलट चेष्टा बिश्नोई वय (वय 21 वर्षे) हे दोघे गंभीर जखमी झाले आहेत.
हा अपघात अंगावर काटा आणणारा होता असे प्रत्यक्षदर्शींनी सांगितले. अपघातात वाहनाचा चक्काचूर झाला. या घटनेची माहिती स्थानिकांसह पोलीसांनी अपघातस्थळी धाव घेतली. अपघातातील जखमींवर सध्या रुग्णालयात उपचार सुरु आहेत. या दुर्दैवी घटनेने परिसरात हळहळ व्यक्त करण्यात येत आहे.
