पुणे : पुण्यातील लेक्सिकॉन मीडिया प्रा. लि. (पुणे टाइम्स मिरर) या मीडिया संस्थेत कार्यरत असल्याचा दावा करणाऱ्या तीन महिला पत्रकारांनी चंदननगर पोलीस ठाण्यात लेखी तक्रार दाखल केली आहे. संस्थेच्या व्यवस्थापनाशी संबंधित काही पदाधिकाऱ्यांविरोधात संगनमत, मानसिक छळ, फसवणूक, सायबर गुन्हा आणि पदाचा गैरवापर केल्याचे गंभीर आरोप तक्रारीत करण्यात आले आहेत.
तक्रारीनुसार, मॅनेजमेंट हेड प्रियांका शर्मा, एचआर अधिकारी निकिता जाधव तसेच संस्थेच्या व्यवस्थापन आणि संचालक मंडळाशी संबंधित काही व्यक्तींनी संगनमताने पूर्वनियोजित कट रचून तीन महिला पत्रकारांवर व्यावसायिक आणि मानसिक अत्याचार केल्याचा दावा करण्यात आला आहे. रोजगाराशी संबंधित कागदपत्रे, सेवासमाप्ती प्रक्रिया, डिजिटल प्रवेश बंद करणे, कामाशी संबंधित नोंदी उपलब्ध न ठेवणे आणि मानसिक दबाव निर्माण करणे अशा बाबींचा तक्रारीत उल्लेख करण्यात आला आहे.
तक्रारदारांनी भारतीय न्याय संहिता (BNS) 2023 तसेच माहिती तंत्रज्ञान कायदा (IT Act) 2000 अंतर्गत कारवाईची मागणी केली आहे. तक्रारीसोबत ई-मेल संवाद, स्क्रीनशॉट्स, कायदेशीर नोटीशीच्या प्रती आणि इतर कागदपत्रे पुरावा म्हणून जोडल्याचेही नमूद करण्यात आले आहे.
तसेच संस्थेच्या डिजिटल नोंदी आणि इलेक्ट्रॉनिक पुरावे सुरक्षित ठेवण्यासाठी तातडीने पावले उचलावीत, अशी मागणीही पोलिसांकडे करण्यात आली आहे. महिलांवरील कथित छळ आणि दखलपात्र स्वरूपाच्या आरोपांच्या पार्श्वभूमीवर सर्वोच्च न्यायालयाच्या ललिता कुमारी विरुद्ध उत्तर प्रदेश सरकार (2014) या निकालाचाही तक्रारीत संदर्भ देण्यात आला आहे.
दरम्यान, तक्रारदारांनी भविष्यातील रोजगाराच्या संधी आणि वैयक्तिक सुरक्षेच्या कारणास्तव आपली ओळख गोपनीय ठेवण्याची विनंती केली आहे. या प्रकरणातील आरोपांची स्वतंत्र पडताळणी अद्याप झालेली नसून संबंधित संस्थेची अधिकृत भूमिका समोर आलेली नाही. पोलिसांकडून तक्रारीची छाननी आणि पुढील तपासानंतरच वस्तुस्थिती स्पष्ट होणार आहे.
