भोर : दौंड तालुक्यातील केडगाव परिसरात उघडकीस आलेल्या गर्भलिंग निदान प्रकरणात किकवी (ता. भोर) येथील डॉ. मंदार माळी यांचे नाव समोर आले असून, यवत पोलिसांनी त्यांचा शोध सुरू केला आहे. या प्रकरणातील प्रमुख आरोपी अण्णासाहेब गिरी आणि त्याचा डॉक्टर साथीदार अतुल जाधव यांना न्यायालयाने पुन्हा दोन दिवसांची पोलिस कोठडी सुनावली आहे.
पोलिस कोठडीत आरोपी अण्णासाहेब गिरी याच्याकडे केलेल्या चौकशीतून या रॅकेटमधील आणखी काही व्यक्तींची नावे समोर आली आहेत. तपास अधिकारी पोलिस उपनिरीक्षक मारोती मेतलवाड यांनी दिलेल्या माहितीनुसार, गर्भलिंग निदानासाठी वापरण्यात आलेले मशीन नरेंद्र ठाकरे याने पुरविल्याची माहिती समोर आली आहे. तसेच किकवी येथील डॉ. मंदार माळी आणि उरुळी कांचन येथील सुंदरम कदम यांची नावेही तपासात पुढे आली असून दोघेही सध्या फरार असल्याचे पोलिसांनी सांगितले.
या प्रकरणातील आरोपींची संख्या आता पाचवर पोहोचली असून, यवत पोलिसांकडून संपूर्ण साखळीचा तपास सुरू आहे. या रॅकेटमध्ये आणखी काही जणांचा सहभाग असण्याची शक्यता पोलिसांनी व्यक्त केली आहे. पोलिस निरीक्षक नारायण देशमुख यांच्या मार्गदर्शनाखाली तपास सुरू असून, या प्रकरणाबाबत कोणाकडे माहिती असल्यास ती यवत पोलिसांना देण्याचे आवाहन करण्यात आले आहे. माहिती देणाऱ्याचे नाव गोपनीय ठेवले जाईल, असेही पोलिसांनी स्पष्ट केले आहे.
