शिरवळ : शिरवळ येथून हरवलेले वयोवृद्ध व्यक्ती केवळ १२ तासांत शोधून काढत शिरवळ पोलिसांनी एक दिलासादायक आणि कौतुकास्पद कामगिरी केली आहे. हरवलेले नागरिक बाळाप्पा मुरगाप्पा तेली (वय ६४), रा. मृदगंध सोसायटी, व्हेटरनरी कॉलेज फुलोरा सोसायटी, शिरवळ हे दि. ७ जून रोजी सायंकाळी ७ वाजता कोणालाही न सांगता घरातून निघून गेले होते.
वडिलांचा संपर्क न आल्याने त्यांचा मुलगा अमित तेली यांनी तत्काळ शिरवळ पोलीस ठाण्यात मिसिंगची तक्रार दाखल केली. या तक्रारीनंतर पोलीस यंत्रणा सतर्क झाली आणि तपासाची चक्रे गतिमान झाली.
महिला, मुले आणि ज्येष्ठ नागरिकांच्या मिसिंग प्रकरणांकडे विशेष गांभीर्याने पाहिले जात असल्याने, पुणे ग्रामीणचे पोलीस अधीक्षक तुषार दोषी, अप्पर पोलीस अधीक्षक डॉ. वैशाली कडुकर आणि उपविभागीय पोलीस अधिकारी राहुल धस यांनी तत्काळ शोधमोहीम हाती घेण्याचे आदेश दिले. या मोहिमेच्या नेतृत्वाची जबाबदारी पोलीस निरीक्षक यशवंत नलावडे यांनी स्वीकारली.
सहाय्यक पो.उ.नि. विलास यादव, पो.कॉ. दीपक पालेपवाड, सुनील मोहरे, दिघे आणि तक्रारदाराचा मित्र विजय लोखंडे यांचा शोधपथकात समावेश होता. त्यांनी हरवलेल्या व्यक्तीचे फोटो आणि माहिती परिसरात विविध ठिकाणी पाठवली आणि शोध कार्य सुरू केले.
शोधमोहीम सुरू असताना सांगवी गावाजवळील कॅनॉल परिसरात बाळाप्पा तेली हे सुखरूप अवस्थेत आढळले. पोलिसांनी त्यांना ताब्यात घेऊन कुटुंबीयांच्या स्वाधीन केले.फक्त १२ तासांत व्यक्ती शोधल्यामुळे कुटुंबीयांनी पोलिसांचे आभार मानले.
