महाबळेश्वरः महाबळेश्वर शहराला निसर्गाने भरभरून वरदान दिले आहे, मात्र पर्यटनाच्या दृष्टीने आजही या ठिकाणी अनेक अडचणींना सामोरे जावे लागत आहे. यामुळे पर्यटन वाढीसाठी दूरदृष्टी असलेले नेतृत्व आपण सर्वांनी विधानसभेत सन्मानाने पाठवायला हवे, यासाठी महाबळेश्वर शहर व परिसरातील महिला, नागरिक आणि व्यापाऱ्यांनी पुरुषोत्तम जाधव यांच्यासारख्या कर्तृत्ववान व अभ्यासू व्यक्तीला आमदार म्हणून विधानसभेत मोठ्या मताधिक्याने पाठण्याचे आवाहन सायली कोंढाळकर यांनी केले. त्या येथील गणेश कॅालनीत झालेल्या कोपरा सभेत बोलत होत्या.
महाबळेश्वर व परिसराच्या पर्यटन विकासासाठी अत्यंत नियोजनबद्ध आराखडा तयार करून वाहतूक कोंडी सारखी समस्या कमी करण्याची गरज आहे. तसेच व्यापाऱ्यांचे देखील अनेक प्रश्न प्रलंबित आहेत. यामुळे अपक्ष उमेदवार पुरुषोत्तम जाधव यांच्या पाठीशी महाबळेश्वर, वाईच्या जनतेने उभे रहावे, असे देखील कोंढाळकर यावेळी बोलताना म्हणाल्या. यावेळी वाई, खंडाळा, महाबळेश्वर विधानसभेचे अपक्ष उमेदवार पुरुषोत्तम जाधव, निशा जाधव यांच्यासह महाबळेश्वर शहरातील नागरिक मोठ्या संख्येने उपस्थित होते. अपक्ष उमेदवार पुरुषोत्तम जाधव यांच्या प्रचारासाठी महाबळेश्वर शहरातील महिलांनी मोठ्या प्रमाणात आघाडी घेतली असून, शहरात घरोघरी जावून महिला जाधव यांचा प्रचार करीत आहेत.
