शिरूर: पोलीस स्टेशनच्या आवारामध्ये एका महिलेने स्वतःच्या अंगावर डिझेल ओतून जाळून घेण्याचा प्रयत्न केल्याचा धक्कादायक प्रकार समोर आला आहे. या प्रकारामुळे परिसरात मोठी खळबळ उडाली आहे. मिळालेल्या माहितीनुसार, घराशेजारील शाळेत रात्रीच्या वेळेस डीजेचा आवाज येत असल्याने व त्याचा आपल्या मुलांच्या अभ्यासात अडथळा येत असल्याने त्याचा जाब विचारायला गेलेल्या महिलेला व तिच्या तरूण मुलाला शाळेत शिवीगाळ करून, धमकावल्या प्रकरणी शिरूर पोलिसांनी शाळेतील शिक्षकांसह १५ जणांविरूद्ध गुन्हा दाखल केला. धक्कादायक बाब म्हणजे शाळेतील शिक्षक दारूच्या नशेत होते, असा आरोप फिर्यादी महिलेने केल्याने व तक्रार दाखल करण्यास पोलीस मदत करत नसल्याने पोलीस ठाण्यासमोर अंगावर रॉकेल ओतून घेतल्याने मोठी खळबळ उडाली आहे. या प्रकरणी एका ४४ वर्षीय महिलेच्या फिर्यादीवरून सुरेश चौगुले व अभिषेक जाधव यांच्यासह १५ जणांविरूद्ध गुन्हा दाखल झाला आहे.
……असा घडला संपूर्ण प्रकार
याबाबत पोलिसांनी दिलेल्या माहितीनूसार, फिर्यादी यांच्या घराजवळ सेंट जोसेफ इंग्लिश मिडिअम स्कूल आहे. दोन महिन्यांपूर्वी (२० जून) रात्रीच्या वेळेस शाळेत डीजे सुरु होता. फिर्यादी यांची मुले युपीएससीचा अभ्यास करीत असल्याने अडथळा आला म्हणून त्या मुलगा जीवन साळवे याच्यासह शाळेत जाब विचारण्यास व डीजेचा आवाज कमी करा म्हणून सांगण्यास गेल्या असता तेथे दहा-बारा जण दारूच्या नशेत आढळून आले. हा प्रकार शाळेच्या मुख्याध्यापकांना दाखवावा म्हणून त्या आपल्या मोबाईलद्वारे या प्रकाराचा व्हिडिओ काढीत असतानाच तिथे मुख्याध्यापिका नॅन्सी पायस या दोन महिलांसह आल्या व त्यांनी फिर्यादीला तु व्हिडिओ का काढते, असा जाब विचारला. तेव्हा डीजेचा आवाज कमी करा, असे सांगण्यासाठी मी आले होते असे सांगण्याचा प्रयत्न त्यांनी केला असता तु कोण असे म्हणत त्यांनी हिला धरून ठेवा मी पोलिसांना बोलावते असे धमकावत दमदाटी केली. ते सगळे दारूच्या नशेत दिसल्याने फिर्यादी यांनी बाहेर निघण्याचा प्रयत्न केला असता, एका महिलेने त्यांना लाथ मारली व मोबाईल घेतला. तसेच मुलगा जीवन साळवे याला सुरेश चौगुले याने धक्काबुक्की केली. त्यानंतरही चौगुले व जाधव यांनी फिर्यादीच्या मुलाला शिवीगाळ करून जीव मारण्याची धमकी दिली. तुम्ही आमचे काहीच बिघडवू शकत नाही, म्हणत वेळोवेळी त्रास दिल्याने साळवे यांनी शिरूर पोलिसांकडे धाव घेत फिर्याद दाखल केली. या प्रकरणाचा पुढील तपास पोलिस उपनिरीक्षक सुनिल उगले हे करीत आहेत.
म्हणून पोलीस ठाण्याच्या आवारात स्वःताच्या अंगावर डिझेल ओतून घेतले
दरम्यान, काही दिवसांपूर्वी फिर्यादी महिला यांचा मुलगा जीवन याच्यासह बेपत्ता झाल्याची तक्रार त्यांचे पती सखाराम साळवे यांनी दिली होती. शाळेतील शिक्षक व कर्मचाऱ्यांनी त्रास दिल्याने निघून जात असल्याचा मेसेज त्यांनी पतीच्या मोबाईलवर पाठविल्यानंतर पोलिसांनी त्याबाबत मिसिंग नोंदवली होती. बुधवारी सायंकाळी साळवे यांनी शिरूर पोलीस ठाण्यासमोरच अंगावर डिझेल ओतून घेतल्याने खळबळ उडाली. बुधवारी रात्री उशिरा त्यांच्या फिर्यादीवरून सेंट जोसेफ शाळेतील शिक्षक जाधव, मदतनीस चौगुले यांच्यासह १५ जणांविरूद्ध गुन्हा दाखल करण्यात आला.
तालुक्यातील पोलीस ठाण्यात सन्मानजक वागणूक मिळत नसल्याचा नागरिकांचा आरोप
शिरूर तालुक्यातील पोलीस स्टेशनमध्ये नागरिकांना सन्मान जनक वागणूक मिळत नसल्याने अनेक वेळा नागरिकांना पोलिसांच्या विरोधात पुणे ग्रामीण पोलीस अधीक्षकांचे कार्यालय गाठावे लागत आहे. तर तेथे निवेदन देऊन, काही वेळा आंदोलन देखील करावी लागत आहे. तर कधी महिलेला अंगावर डिझेल ओतून घेऊन टोकाचे पाऊल उचलण्यासाठी भाग पडत आहे, त्यानंतर कुठे तक्रारदाराची दाखल घेतली जात आहे. या प्रकारामुळे शिरूर तालुक्यातील शिक्रापूर, रांजणगाव, शिरूर पोलिसांच्या कामगिरीवर प्रश्नचिन्ह उपस्थित केले जात आहे. याबाबत आता पुणे पोलीस ग्रामीण अधीक्षक पंकज देशमुख यांनी लक्ष घालण्याची गरज असल्याचे नागरिकांचे मागणी आहे.
