साताराः पुणे- बंगळुरू महामार्गावर कराडजवळ मंगळवारी रात्री टाकण्यात आलेल्या सशस्त्र दरोड्यातील तीन कोटींपैकी २ कोटी ८९ लाख ३४ हजारांची रक्कम स्थानिक गुन्हे शाखा व कराड शहर पोलिसांनी हस्तगत केली आहे. दरोड्यासाठी दोन महिने संबंधित टोळीने रेकी केली असल्याची माहिती पोलिसांनी दिली. तसेच फिर्यादी चालक शैलेश घाडगे व बदली चालक अविनाश घाडगे या दोघांवरही गुन्हा दाखल केल्याचे पोलिसांनी सांगितले.
मुंबईहून कर्नाटकाला हवालाची तीन कोटींची रक्कम पोहोचवण्यासाठी निघालेल्या मोटारगाडी चालकाला ‘हनी ट्रॅप’च्या जाळ्यात ओढून हा सशस्त्र दरोडा टाकण्यात आला असल्याची माहिती पोलिसांनी दिली. तसेच समाज माध्यामातून संपर्कात आलेल्या महिलेने चालकाचे ‘लोकेशन’ शोधले आणि ‘हनी ट्रॅप’मुळे चालक गुन्ह्यात अडकल्याचे पोलीस तपासातून समोर आले आहे. या प्रकरणातील अनेक धागेदोरे यांचा तपास पोलीस आणि गुन्हे शाखा करीत आहेत. या प्रकरणात कराडच्या कुख्यात गुंडाचाही सहभाग असल्याची माहिती मिळत आहे. संबंधित गुंड व आणखी एक इसम फरार आहे. हे दोघेही लवकरच हाती येतील, असा विश्वास पोलिसांना आहे.
प्रकरण काय आहे?
संशयित महिलेची समाज माध्यमावर चालक घाडगे याच्याशी ओळख होऊन त्यांच्यात संवाद होत होता. दोन महिन्यांपूर्वी त्यांच्यात व्हिडिओच्या माध्यमातून संवाद झाला होता. त्यावेळी त्याने हवालाचे पैसे पोहोचवण्यासाठी निघालेले वाहन दाखवले. ही माहिती त्या महिलेने तिच्या ओळखीच्या मांगलेकरला दिली. त्याने ही माहिती मुख्य सूत्रधारास दिली आणि लुटीचा कट शिजवण्यात आला. दोन्ही कार चालकांना लुटीतीलच १७ लाखांची रक्कम देण्यासह खोटी फिर्याद देण्यास सांगण्यात आले. मात्र, फिर्यादीच्या माहितीत विसंगती आढळल्याचे पोलिसांनी सांगितले.
संबंधित महिलेसह १० जण गजाआड
अजमेर मोहमंद मांगलेकर (३६, रा. गोळेश्वर- कराड), नजर मोहमंद आरीफ मुल्ला (३३, रा. रविवार पेठ, कराड) करीम अजीज शेख (३५, रा. मंगळवार पेठ, कराड), नजीर बालेखान मुल्ला (३३, रा. सैदापूर) यांच्यासह रक्कम घेऊन निघालेल्या मोटारगाडीचे चालक शैलेश शिवाजी घाडगे (२४) व अविनाश संजय घाडगे (२१, दोघेही रा. निमसोड, ता. खटाव), ऋतुराज धनाजी खडंग (२१), त्याचा भाऊ ऋषिकेश (२६) तसेच अक्षय अशोक शिंदे (२१, तिघेही रा. तांबवे, ता. कराड) आणि कराडच्या मंगळवार पेठेतील संशयित महिला अशांना अटक झाली आहे.
ईडी व इन्कम टॅक्स विभागही तपास करणार
संबंधित प्रकरणातील हवालाची रक्कम ही मोठी आहे. ही रक्कम कोणाला द्यायची होती, कुठे पोहचवायची होती. असे अनेक प्रश्न निर्माण झाल्याने मोठे मासे गळाला लागण्याची शक्यता वर्तवली जात आहे. यामुळे आता या प्रकरणातील रक्कमेची खातरजमा करण्यासाठी सक्त वसुली संचालनालय व प्राप्तिकल विभागाला कळवले असून, यासह अन्य संबंधित विभाग या रोकड संदर्भात विशेष तपास करणार आहेत.
