पुणेः शहरात महिलांवरील अत्याचार तसेच विनयभंगाची घटना सातत्याने घडतच आहे. यातच आता हरवलेले मांजर शोधून देण्याचे आश्वासन देऊन महिलेचा मोबाईल नंबर घेऊन एका नराधमाने तिच्याकडे शरीरसुखाची मागणी केल्याचा धक्कादायक प्रकार समोर आला आहे. तसेच महिलेच्या व्हॅाट्सपवर अश्लिल चित्रफीत व अॅाडिओ देखील पाठवल्याचे महिलेने म्हटले आहे. या प्रकरणी ४९ वर्षीय महिलेने चतुःश्रृंगी पोलिसांत तक्रार दिली आहे, त्यावरून पोलिसांनी अविनाश नावाच्या व्यक्तीवर गुन्हा दाखल केला आहे.
पोलिसांनी दिलेल्या माहितीनुसार, तक्रार दिलेल्या महिलेने मांजर पाळले होते. काही दिवसांपासून मांजर बेपत्ता आहे. त्यामुळे महिलेने मांजराचा शोध घेत असतानाही ते मिळाले नाही. या दरम्यानच्या काळात महिलेच्या येथे राहणार्‍या अविनाश नामक व्यक्तीने त्यांना हरवलेले मांजर शोधून देतो, असे म्हणत त्यांचा मोबाईल नंबर घेतला. मांजर शोधून दिल्याच्या बदल्यात तुम्ही माझ्या सोबत तसेच माझ्या बॉससोबत शारीरीक संबंध ठेवा, असे बोलून त्यांचा विनयभंग केला. तसेच त्यांच्या व्हॉटसअ‍ॅपवर अश्लिल व्हिडिओ व ऑडिओ देखील पाठवला. असे तक्रार म्हटले आहे. या प्रकरणाचा पुढील तपास पोलीस निरीक्षक करीत आहेत.
