नारायणपूरः श्रीक्षेत्र नारायणपूर येथील श्री सद्गुरु नारायण महाराज यांचे सोमवारी ९ सप्टेंबर रोजी रात्री ११ वाजण्याच्या सुमारास वृद्धपकाळाने निधन झाले आहे. ते 85 वर्षांचे होते. नारायणपूर येथील दत्त मंदिरात नारायण महाराज यांचे वास्तव्य होते. तसेच नारायणपूरला एक मुखी दत्त मंदिर आहे, तिथेच ते राहायला देखील होते. नारायण महाराज यांच्या जाण्याने भाविकांमध्ये हळहळ व्यक्त केली जात आहे. नारायण महाराज यांचे अंत्यदर्शन मंगळवारी (10 सप्टेंबर) दुपारी 2 पर्यंत श्री क्षेत्र नारायणपूर येथे घेता येणार आहे. तर सायंकाळी चारला त्यांच्या पार्थिवावर अंत्यसंस्कार होतील.
दुपारी 4 वाजता पार पडणार अंत्यसंस्कार
भाविकांचे श्रद्धास्थान परमपुज्य निश्खचैतन्य श्री सदगुरु नारायण महाराज हे ‘अण्णा’ या नावाने त्यांची ओळख होती. राज्यभरात त्यांचा मोठा शिष्यवर्ग आहे. नारायण महाराजांचे पार्थिव सकाळी 8 ते दुपारी 2 वाजेपर्यंत अंत्यदर्शनासाठी येथील मंदिरात ठेवण्यात येणार आहे. तर दुपारी 4 वाजता यज्ञकुंडाजवळ पार्थिवावर अंत्यसंस्कार करण्यात येणार आहे.
भारतातील चार दिशांना बांधले चार दत्तधाम
नारायण महाराज हे विविध समाजकार्यात नेहमी अग्रेसर असायचे. सामुदायिक विवाह सोहळ्याला त्यांनी सातत्याने प्रोत्साहन दिले. गावोगावी आपल्या शिष्यांच्या माध्यमातून त्यांनी व्यसनमुक्ती चळवळ, सामुदायिक शेती आणि श्रमदानाचे उपक्रम राबवले. नारायण महाराजांनी भारतातील चार दिशांना चार दत्तधाम बांधले, त्यापैकीच एक नारायणपूर आहे.
