खेड शिवापूर (ता. हवेली) येथील ससेवाडीजवळ आज सकाळी एक भीषण अपघात घडला. प्रवासी बसला अचानक आग लागल्यामुळे एकच खळबळ उडाली. आगीने काही क्षणात संपूर्ण बस जळून खाक झाली.
आग लागल्यानंतर प्रसंगावधान राखत बसमधील प्रवाशांनी तत्काळ बसमधून उड्या मारल्या, त्यामुळे सुदैवाने कोणतीही जीवितहानी झाली नाही. बसमध्ये किती प्रवासी होते याची नेमकी माहिती मिळालेली नसली, तरी सर्व प्रवासी सुखरूप असल्याचे प्राथमिक वृत्त आहे.
बसला आग नेमकी कशामुळे लागली, हे अद्याप स्पष्ट झालेले नाही. दरम्यान, या घटनेमुळे महामार्गावर मोठ्या प्रमाणावर वाहतूक कोंडी झाली. स्थानिक नागरिक आणि प्रवासी घटनास्थळी जमा झाले होते.
आग विझवण्यासाठी अग्निशमन दलाला पाचारण करण्यात आले असून, त्यांनी आग आटोक्यात आणली आहे. या घटनेचा अधिक तपास सुरू आहे.
