खंडाळा: विद्यमान आमदार यांनी कधीही वाई, खंडाळा आणि महाबळेश्वरच्या विकासासाठी विधिमंडळात आवाज उठवला नाही. कार्यक्षमता नसलेले लोकप्रतिनिधी वाई विधानसभा मतदार संघाला लाभलेले आहेत. गेल्या पन्नास वर्षांत खंडाळा तालुक्यातील पूर्व भागातील शेतीच्या पाण्याचा प्रश्न त्यांना सोडवता आलेला नाही. वाई, खंडाळा तालुक्यातील हक्काचे पाणी दुसऱ्या जिल्ह्याला गेले. परिणामी खंडाळा तालुका कोरडाच राहिला. मतदारसंघात तीन-तीन जलसिंचन योजना असून, त्याला योग्य तो निधी त्यांना मिळत नाही. अशा शब्दांत वाई विधानसभेचे अपक्ष उमेदवार पुरुषोत्तम जाधव यांनी विद्यमान आमदारांवर हल्लाबोल चढविला.
यामुळे आता खंडाळा तालुक्यातील स्वाभिमानी जनतेने विद्यमान आमदारांना घरी बसवावे व आपल्या सुखदुःखात असणाऱ्या माणसाला साथ द्यावी, अशी भावनिक साद त्यांनी खंडाळा तालुक्यातील भादे या गावातून मतदारांना केली आहे. शिरवळ, खंडाळा येथील औद्योगिक विकासाला चालना देऊन स्थानिक भूमिपुत्रांना नोकरी व्यवसायासाठी प्रेरित करण्याची गरज असताना मूकनायक आमदार मात्र कोणतेही काम करताना दिसत नाहीत, असे देखील जाधव यावेळी म्हणाले. यामुळे येणाऱ्या २० तारखेला वाई, खंडाळा, महाबळेश्वर विधानसभा मतदारसंघात मतदार क्रांती घडवेल, असा विश्वास पुरुषोत्तम जाधव यांनी यावेळी बोलताना व्यक्त केला.
प्रचारात कुटुंबाचा मोलाचा वाटा, गावोगावी मतदारांच्या भेटी
यावेळी अपक्ष उमेदवार पुरुषोत्तम जाधव यांनी पिसाळवाडी, धनगरवाडी, माने कॉलनी, भोळी, शेखमीरवाडी, लोणी, तोंडल, भादे, वाठार, शेडगेवाडी, अंदोरी, भाऊकलवाडी, मरीआचीवाडी, पिंपरी, पाडेगाव, लोणंद येथे जाऊन प्रत्यक्ष मतदारांच्या गाठीभेटी घेऊन तेथील प्रश्न जाणून घेतले. जाधव यांच्या प्रचारासाठी त्यांचे संपूर्ण कुटुंब त्यांच्या पत्नी, मुलगा, दोन मुली ,जावई ,नातवंडे असा संपूर्ण परिवार प्रत्येक गावात जाऊन प्रत्यक्ष मतदारांच्या गाठीभेटी घेत आहे.
