संपादक | जीवन सोनवणे,भोर
भोर : केडगाव (ता. दौंड) येथील गाजत असलेल्या गर्भलिंग निदान व बेकायदा गर्भपात प्रकरणात आज आणखी दोन डॉक्टरांवर गुन्हा दाखल करण्यात आला. डॉ. स्वाती लवंगारे आणि डॉ. तुकाराम मोटे यांच्याविरोधात यवत पोलीस ठाण्यात बेकायदा गर्भपाताच्या गोळ्या महिलांना दिल्याप्रकरणी गुन्हा नोंदविण्यात आला असून डॉ. तुकाराम मोटे यांना अटकही करण्यात आली आहे. मात्र, या संपूर्ण प्रकरणातील आरोपी असलेले भोर तालुक्यातील किकवी येथील डॉ. मंदार माळी अद्याप फरार असल्याने चर्चांना उधाण आले आहे.
२० मे रोजी केडगाव येथील गर्भलिंग निदान रॅकेटचा पर्दाफाश झाल्यानंतर या प्रकरणात तीन डॉक्टरांसह पाच जणांवर गुन्हे दाखल करण्यात आले होते. त्यामध्ये डॉ. मंदार माळी यांचे नाव समोर आले होते. गुन्हा दाखल होऊन अनेक दिवस उलटले तरी त्यांचा शोध लागलेला नाही.
आजच्या कारवाईत आरोग्य विभागाच्या भरारी पथकाने केलेल्या तपासणीत लवंगारे मॅटरनिटी होममध्ये गर्भपाताच्या गोळ्या आढळून आल्याचे समोर आले. त्यानंतर डॉ. स्वाती लवंगारे व डॉ. तुकाराम मोटे यांच्याविरोधात गुन्हा दाखल करण्यात आला. त्यामुळे या प्रकरणातील आरोपींची संख्या आणखी वाढली आहे.
दरम्यान, राज्याचे आरोग्यमंत्री प्रकाश आबिटकर तसेच विधान परिषदेच्या उपसभापती निर्मला गोऱ्हे यांनी या प्रकरणाची गंभीर दखल घेतली आहे. तपासाचा वेग वाढत असताना काही आरोपींवर कारवाई होत आहे, मात्र डॉ. मंदार माळी अद्याप पोलिसांच्या हाती लागत नसल्याने प्रश्नचिन्ह निर्माण झाले आहे.
डॉ. माळी अटकेपासून बचाव करण्यासाठी अटकपूर्व जामिनाच्या प्रयत्नात असल्याची चर्चा असून, दुसरीकडे पोलिसांचे पथक त्यांचा शोध घेत असल्याचे सांगितले जात आहे. मात्र, अनेक दिवसांपासून ते फरार असल्याने “पोलिसांना गुंगारा की तपासात कानाडोळा?” असा सवाल नागरिकांमधून उपस्थित केला जात आहे.
आज दोन डॉक्टरांवर नव्याने गुन्हा दाखल होऊन एकाला अटक झाली असताना, डॉ. मंदार माळी यांना अटक कधी होणार याकडे आता सर्वांचे लक्ष लागले आहे.
