नसरापूर : कामथडी पंचायत समिती गणात आगामी निवडणुकीची चाहूल लागल्यापासून इच्छुक उमेदवारांचा प्रचाराचा जोर चांगलाच वाढला आहे. यंदा हा गण सर्वसाधारण महिला आरक्षित असल्याने महिला उमेदवारांना पुढे आणण्यासाठी वेगवेगळे प्रयोग होताना दिसत आहेत. मात्र, या प्रचारात आता नव्या प्रकारचा ट्रेंड पाहायला मिळतोय — भात काढणीच्या हंगामात पोत्यावरून प्रचार!
सध्या परिसरात शेतकरी भात काढणीच्या कामात व्यस्त असताना काही इच्छुकांनी त्याचाच फायदा घेत प्रचाराचे पोते वाटप करण्यास सुरुवात केली आहे. या पोत्यांवर पक्षाचे चिन्ह, इच्छुक उमेदवाराचे फोटो, तसेच आकर्षक घोषवाक्ये छापण्यात आली आहेत. ग्रामीण भागात वापरले जाणारे हे पोते प्रत्येक घरात पोहोचत असल्याने हा प्रचार प्रभावी ठरतोय. काही ठिकाणी महिलांच्या मेळाव्याचे आयोजन करून पोते, साड्या, बक्षीसे वाटप केली जात आहेत.
दरम्यान, काही कार्यकर्त्यांनी “कार्यकर्ता मेळावा व बक्षीस वितरण सोहळे” आयोजित करून मतदारांना आपल्या बाजूला वळविण्याचे प्रयत्न सुरू केले आहेत. अशा कार्यक्रमांना उत्स्फूर्त गर्दी दिसत असली, तरी विकासकामांचा उल्लेख तिथे फारसा होत नाही. उलट, मतदारांना फक्त गोड बोलून आणि भेटवस्तूंच्या माध्यमातून आकर्षित करण्याचा प्रयत्न सुरू आहे, अशी टीका जनतेतून होताना ऐकू येते.
स्थानिक नागरिकांचा आरोप आहे की हे इच्छुक उमेदवार निवडणुकीच्या काळातच भागात दिसतात. मतमोजणीनंतर मात्र हेच लोक पुन्हा शहराच्या दिशेने रवाना होतात. विकास, रस्ते, पाणी, रोजगार अशा मूलभूत प्रश्नांवर कुणाचेही लक्ष नसून, “फोटो, बॅनर आणि पोते” हाच प्रचाराचा नवा चेहरा बनला आहे.
कामथडी गणातील मतदार आता या पोत्यावर चालणाऱ्या राजकारणाकडे शंकेच्या नजरेने पाहत आहेत. खरं समाजकारण म्हणजे लोकांच्या समस्या समजून घेऊन उपाययोजना करणे, परंतु निवडणुकीच्या तोंडावरच दिसणाऱ्या या पोत्याधारित प्रचारामुळे मतदारांमध्ये नाराजी वाढताना दिसते.
