शिरूर : शेतातील कामे करण्यास सांगितल्याच्या किरकोळ कारणावरून संतापलेल्या नातवाने आपल्या ८४ वर्षीय आजोबांचा लोखंडी गजाने मारहाण करून खून केल्याची धक्कादायक घटना शिरूर तालुक्यातील बाभुळसर बुद्रुक येथे सोमवारी (दि. १५) सकाळी घडली. या घटनेमुळे संपूर्ण परिसरात खळबळ उडाली आहे.
दशरथ यशवंत राऊत (वय ८४) असे मृत्यू झालेल्या वृद्धाचे नाव असून, सोमनाथ बाळासाहेब राऊत (वय २६) असे आरोपी नातवाचे नाव आहे. याप्रकरणी मृताचे पुत्र दुर्योधन दशरथ राऊत यांनी शिरूर पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, सोमवारी सकाळी सुमारे आठ वाजता दशरथ राऊत यांनी नातू सोमनाथ याला शेतातील कामांबाबत सूचना केल्या. यावरून दोघांमध्ये वाद झाला. हा वाद वाढत गेल्यानंतर संतापाच्या भरात सोमनाथने घरातील लोखंडी गज उचलून आजोबांच्या डोक्यावर आणि पाठीवर जोरदार वार केले.
या हल्ल्यात दशरथ राऊत गंभीर जखमी झाले. डोक्याला आणि शरीराच्या विविध भागांना गंभीर दुखापत झाल्याने त्यांचा जागीच मृत्यू झाला. ज्यांनी लहानपणापासून नातवाला वाढवले, संस्कार दिले, त्याच आजोबांचा नातवाकडून झालेला दुर्दैवी अंत गावकऱ्यांना हादरवून गेला.
घटनेची माहिती मिळताच शिरूर पोलीस ठाण्याचे पोलीस निरीक्षक विनोद पाटील यांच्या मार्गदर्शनाखाली पोलिसांचे पथक घटनास्थळी दाखल झाले. पोलिसांनी पंचनामा करून तपास सुरू केला. गुन्हा घडल्यानंतर आरोपी फरार होण्याच्या प्रयत्नात असताना पोलिसांनी तातडीने शोधमोहीम राबवत काही तासांतच त्याला ताब्यात घेतले.
आरोपीविरुद्ध खुनाचा गुन्हा दाखल करण्यात आला असून, पुढील तपास पोलिस उपनिरीक्षक दिलीप पवार करीत आहेत.
