भोर : घराचे सुरू असलेले बांधकाम, त्यासाठी लागणारा खर्च आणि मुलाचे दारूचे व्यसन यावरून आई मुलाला वारंवार समजावत होती. ‘दारू पिऊ नको, घराचं काम कसं होणार?’ असे सांगत असतानाच दोघांमध्ये वाद झाला. त्यानंतर दारूच्या नशेत असलेल्या मुलाने आई झोपलेली असताना तिच्या डोक्यात लोखंडी रॉडने वार करून तिची हत्या केल्याची धक्कादायक घटना वेळवंड खोऱ्यातील म्हाळवडी येथे शुक्रवारी (दि. ७) सायंकाळी घडली.
या घटनेत बेबी काळू मालुसरे (वय ५२) यांचा मृत्यू झाला असून, आरोपी मुलगा समीर काळू मालुसरे (वय ३१) याला भोर पोलिसांनी ताब्यात घेतले आहे.
म्हाळवडी येथे मालुसरे कुटुंबीयांच्या घराचे बांधकाम सुरू आहे. बांधकामासाठी पैशांची आवश्यकता असताना समीर दारूच्या आहारी गेल्याने आई त्याला वारंवार दारू पिऊ नको, असा सल्ला देत होती. याच कारणावरून शुक्रवारी दोघांमध्ये वाद झाल्याची माहिती आहे.
सायंकाळी सुमारे चार वाजण्याच्या सुमारास बेबी मालुसरे झोपण्यासाठी आडव्या झाल्या. त्यावेळी समीरने लोखंडी रॉडने त्यांच्या डोक्यात वार केला. गंभीर दुखापत झाल्याने त्यांचा मृत्यू झाला.
घटनेनंतर समीरने आईचा मृतदेह घरातच ठेवला आणि घराला बाहेरून कुलूप लावले. त्यानंतर शेजाऱ्यांना आई गावाला गेल्याचे सांगून घटनेची माहिती लपविण्याचा प्रयत्न केल्याचे समोर आले आहे.
मात्र दुसऱ्या दिवशी सकाळी सुमारे सात वाजता दारूची नशा उतरल्यावर समीरने स्वतः आपल्या चुलत भावाला या घटनेची माहिती दिली. ‘आई उठत नाही, मी काल तिला मारलं होतं,’ असे त्याने चुलत भावाला सांगितल्याची प्राथमिक माहिती आहे. त्यानंतर चुलत भावाने पोलिसांना माहिती दिली.
माहिती मिळताच भोर पोलिसांचे पथक घटनास्थळी दाखल झाले. पोलिसांनी घटनास्थळाची पाहणी करून आरोपी समीर मालुसरे याला ताब्यात घेतले. घटनेचा पुढील तपास सुरू आहे.
दारूचे व्यसन, घराच्या बांधकामाचा ताण आणि आईने केलेला विरोध याचा शेवट आईच्या हत्येत झाल्याने म्हाळवडी परिसरात खळबळ उडाली आहे. घटनेमागील संपूर्ण परिस्थितीचा पोलिसांकडून तपास केला जात आहे.
पोलीस निरीक्षक निलेश माने यांच्या मार्गदर्शनाखाली दत्तात्रय जाधव, विशाल मोरे, दीपक गायकवाड व हेमंत भिलारे पुढील तपास करीत आहेत.
