साताराः येथील भुईज हद्दीतून तिघांचे अपहरण करून त्यांना स्फिट कारमध्ये बसवून कोरेगाव जवळील आदर्की गावच्या हद्दीत गाडीतून ढकलून देण्यात आले होते. यावेळी झालेल्या वादातून या तिघांपैकी एकावर अपहरणकर्त्यांनी चाकूने वार केल्याची धक्कादायक घटना घडली आहे. या घटनेने संपूर्ण सातारा जिल्हा हादरला असून, या घटनेत जखमी झालेली व्यक्ती जावली तालुक्यातील असून संशयित आरोपींच्या तपासासाठी भुईज पोलिसांचे पथक रवाना करण्यात आले आहे.
….अन् चाकू भोकसला
याबाबत भुईंज पोलीसांनी दिलेली माहितीनुसार, फिर्यादी मयुर विकास जाधव (वय २६ वर्षे रा. शेते ता. जावली) हा आपले दोन सहकारी (जुबेर शेख रा. कुडाळ ता जावली) व अजय महामुलकर (ता. जावली) यांच्या बरोबर भुईज येथे आला होता. सायंकाळी साडे सहाच्या दरम्यान या तिघांना एका स्विफ्ट कारमधून आलेल्या इसमांनी त्यांच्याशी संवाद साधत त्यांना गाडीत बसवले व त्यांना वाठार ता. कोरेगाव नजीक आदर्की गावच्या हद्दीत यातील दोघांना गाडीतून ढकलून दिले. यावेळी त्यांच्यात वादावादी झाली. याच दरम्यान अपहरणकर्त्यांनी जुबेर शेख याला चाकू भोकसण्यात आला.
मोठ्या शिताफिने केली सुटका
त्यानंतर फिर्यादी मयुर यास दहिवाडी (ता. माण ) येथे नेण्यात आले. त्या ठिकाणी बंद घरात डांबून ठेवण्यात आले होते. मोठ्या शिताफिने मयुरने स्वतःची सुटका करत तेथून घरी परतला व जखमी जुबेर शेख याची चौकशी करत त्याला पुणे येथे पुढील उपचारासाठी दाखल केल्याची माहिती यावेळी पोलिसांनी दिली. तिघांचे अपहरण करण्यामागचा अपहरणकर्त्यांचा हेतू काय होता. हा प्रश्न अनुउत्तरित आहे. भुईंज पोलीसांनी तपास यंत्रणा राबवून संशयित आरोपींना ताब्यात घेण्याचा प्रयत्न केला. पण त्यात त्यांना यश आलेले नाही. फरार आरोपींचा शोध पोलीस घेत आहेत. या प्रकरणाचा तपास भुईज पोलीस स्टेशनचे सहाय्यक पोलीस निरीक्षक रमेश गर्जे व गुन्हे प्रकटीकरण विभाग करीत आहे.
