राजगडः राज्यात निवडणुकीच्या अनुषंगाने ठिकठिकाणी भरारी पथकांची नेमणूक करण्यात आली असून, संशयास्पद वाटणाऱ्या वाहनांची पोलिसांकडून झडती घेतली जात आहे. याच अनुषंगाने पुणे-सातारा महामार्गावरील खेड शिवापूर टोल नाक्यावर आज सायंकाळच्या सुमारास एका वाहनामधून काही रक्कम नेण्यात येत असल्याची माहिती राजगड पोलिसांना मिळाली. त्यानुसार राजगड पोलिसांनी संबंधित वाहनाची झडती घेतली असता त्या वाहनामध्ये तब्बल ५ कोटी रुपयांची रोख रक्कम पोलिसांना मिळून आली आहे. तसेच सदर वाहन हे सत्तेतील एका बड्या आमदाराचे असल्याची प्राथमिक माहिती मिळत आहे. यामुळे एकच खळबळ उडाली आहे.
सदर रक्कम आणि इनोव्हा क्रिस्टा कंपनीचे चारचाकी वाहन क्रमांक एमएच ४५ एएस २५२६ पोलिसांनी कारवाईत हस्तगत केले असून, नलवडे नावाच्या व्यक्तीची ही गाडी आहे. या कारमधून ही रोकड सांगोल्याला नेण्यात येणार होती. तसेच घटनास्थळी पोलीस प्रशासनातील अधिकारी वर्ग तसेच तहसिदार, प्रांतअधिकारी आदी दाखल झाले आहे. तसेच आयकर विभाग, फाईंग स्कॅाड देखील भेट देणार असल्याची माहिती मिळत आहे. सदर वाहनात चारजण असल्याची माहिती असून, यातील एकजण संबंधित आमदाराचा नातेवाईक असल्याची माहिती मिळत आहे. राजगड पोलिसांकडून गुन्हा दाखल करण्याचे काम सुरू असून, यामुळे एकच खळबळ उडाली आहे.
संजय राऊतांचा रोख कुणावर?
संजय राऊत यांनी एक्स या समाजमाध्यमावर मिंधे टोळीतील एका आमदाराच्या गाडीत खेड शिवापूर टोल नाक्यावर 15 कोटी सापडले! हे आमदार कोण? काय झाडी…काय डोंगर…मिंधे यांनी निवडणुकीसाठी प्रत्येक उमेदवारास 75 कोटी पाठवले. 15कोटी चा हा पहिला हप्ता! काय बापू..किती हे खोके? असा खोचक सवाल संजय राऊत यांनी केला आहे.
