नसरापूरः घरी जात असताना एका ५२ वर्षीय व्यक्ती गुंजवणी नदी पात्रात बेशुद्ध अवस्थेत आढळून आलेल्या या व्यक्तीला रुग्णालयात उपचारासाठी दाखल करण्यात आले होते. मात्र, या व्यक्तीचा उपाचारापूर्वीच मृत्यू झाला होता. तसेच नदी पात्रावरील बंधाऱ्याच्या कठड्याला मयत व्यक्तीची दुचाकी संशयास्पद पद्धतीने लटकलेल्या अवस्थेत दिसून आली होती. यामुळे हा अपघात नसून घातपातच असल्याचा आरोप मयताच्या नातेवाईकांनी केला आहे.
गणपत गेनबा खुटवड वय ५२ रा. हातवे ( ता. भोर ) असे संशयास्पद मृत्यू झालेल्या व्यक्तीचे नाव आहे. सदर घटना ही रविवार ( दि. २२ ) रोजी दिडघर ते हातवे ( ता. भोर ) या मार्गावरील गुंजवणी नदी बंधारा पुलावर रात्री अकरा वाजण्याच्या सुमारास घडली होती. या घटनेची माहिती समजताच नातेवाईकांनी घटनास्थळी धाव घेतली. यावेळी नदीपात्रात बेशुद्धावस्थेत खुटवड आढळून आले होते. नातेवाईकांनी त्यांना तातडीने रुग्णालयात उपचारासाठी हलवले. मात्र, उपचारापूर्वीच खुटवड यांना डॅाक्टरांनी मयत घोषित केले.
सहाय्यक पोलीस निरीक्षक रमेश गायकवाड, मंगेश कुंभार यांनी घटनास्थळी जाऊन पंचनामा केला. यावेळी मयत गणपत खुटवड यांची दुचाकी बंधाऱ्यावरील मोरीच्या एक नंबरवर होती. तर नदीपात्राच्या मध्यभागी खुटवड बेशुद्धावस्थेत आढळून आले होते. तसेच घटनास्थळी अनेक विसंगती बाबी असल्याचे संदीप खुटवड यांनी सांगितले होते. या प्रकरणी त्यांनी राजगड पोलिसांना तीन संशयिताचे नावे दिली असून, यामध्ये अजून दोन जण असल्याचे आरोप संदीप खुटवड यांनी केलेले आहेत. या प्रकरणी राजगड पोलिसांनी आकस्मात मूत्यू दाखल केला असून चौकशीअंती तपासानंतर पुढील गुन्हा दाखल करणार असल्याचे राजगड पोलिसांनी सांगितले आहे.
संशयास्पद मृत्यू: मयताच्या नातेवाईकांचा आरोप
नातेवाईकांच्या म्हणण्यानुसार पोलिसांनी संशयास्पद मृत्यूचा गुन्हा दाखल करावा व संशयतांना ताब्यात घेऊन त्यांची चौकशी करावी, अशी मागणी नातेवाईकांनी केली आहे. यासाठी मयत व्यक्तीचे नातेवाईक आज सकाळी पुन्हा एकदा राजगड पोलीस स्टेशन या ठिकाणी आले होते.
