पुणे : आलिशान चारचाकी वाहनातून अग्निशस्त्रे घेऊन फिरणाऱ्या दोघांना नन्हे पोलिसांनी जेरबंद केले. आरोपींकडून दोन पिस्तूल, तीन जिवंत काडतुसे आणि MH 14 CK 0004 क्रमांकाची चारचाकी असा एकूण ६ लाख ३३ हजार रुपयांचा मुद्देमाल जप्त करण्यात आला आहे. ही कारवाई १० ऑगस्ट रोजी पारी कंपनी चौक ते उंड्री गणपती चौकादरम्यान करण्यात आली.
नन्हे पोलीस ठाण्याचे पोलीस उपनिरीक्षक विजयसिंह घाडगे यांच्यासह पोलीस कर्मचारी गुन्हे प्रतिबंधक पेट्रोलिंग करत असताना गोपनीय बातमीदारामार्फत संशयित वाहनाबाबत माहिती मिळाली. त्यानुसार पोलिसांनी MH 14 CK 0004 क्रमांकाच्या वाहनाची पाहणी केली. वाहनात दोन संशयित आढळून आले. त्यांची चौकशी केली असता शुभम ऊर्फ सोनू अनिल शिंदे (वय २६) आणि अथर्व ऊर्फ आप्पा उमाकांत सणस (वय २३) अशी त्यांची नावे असल्याचे समोर आले.
पोलिसांनी वाहनाची झडती घेतली असता एका पिस्तुलासह एक जिवंत काडतूस आढळून आले. पोलिसांनी हे अग्निशस्त्र व काडतूस ताब्यात घेत आरोपींना अटक केली. त्यानंतर पोलीस कोठडीदरम्यान करण्यात आलेल्या तपासात आरोपींकडून आणखी एक पिस्तूल आणि दोन जिवंत काडतुसे जप्त करण्यात आली.
या कारवाईत पोलिसांनी दोन पिस्तूल, तीन जिवंत काडतुसे आणि चारचाकी वाहन असा एकूण ६ लाख ३३ हजार रुपयांचा मुद्देमाल जप्त केला आहे. आरोपींकडे ही अग्निशस्त्रे कुठून आली, त्यांचा वापर कोणत्या उद्देशाने केला जाणार होता आणि या प्रकरणामागे आणखी कोणाचा सहभाग आहे का, याचा तपास पोलीस उपनिरीक्षक विजयसिंह घाडगे करीत आहेत.
ही कारवाई पोलीस आयुक्त अमितेश कुमार, सहपोलीस आयुक्त संजय दराडे, अपर पोलीस आयुक्त राजेश बनसोडे, पोलीस उपआयुक्त डॉ. सागर कवडे, सहायक पोलीस आयुक्त विजयकुमार सोहा, वरिष्ठ पोलीस निरीक्षक वर्षा देशमुख आणि पोलीस निरीक्षक ईश्वर चव्हाण यांच्या मार्गदर्शनाखाली करण्यात आली.
कारवाईत पोलीस उपनिरीक्षक विजयसिंह घाडगे, पोलीस अंमलदार पांडुरंग पवार, निलेश भोरडे, प्रणिल मेस्त्री, देवा चव्हाण, सुनील चव्हाण, कार्तिक कोंडे, राजू तोरे, नितीन वाघमारे, धुळा गारळे, गोविंदराव कपाटे, स्वप्नील सूर्यवंशी आणि सुमित जगताप यांनी सहभाग घेतला.
