पुणे: जिल्ह्यातील पौड येथे आज सकाळी एक हेलिकॉप्टर कोसळल्याची धक्कादायक घटना घडली. या अपघातात हेलिकॉप्टरमधील पायलटसह चारही प्रवासी जखमी झाले असून, त्यापैकी दोन जणांची प्रकृती गंभीर असल्याची माहिती आहे.
घटनास्थळी उपस्थित पोलिसांनी दिलेल्या माहितीनुसार, मुंबईच्या ग्लोबल हेक्ट्रा कंपनीचे AW 139 हे हेलिकॉप्टर मुंबईच्या जुहू विमानतळावरून उड्डाण करून विजयवाड येथे जात होते. हे हेलिकॉप्टर पौड येथे घिरट्या घालत असताना अचानक कोसळले. या घटनेनंतर घटनास्थळी मोठी गर्दी जमली.
बचावकार्य युद्धपातळीवर
घटनास्थळी पोहोचलेल्या पोलिसांनी आणि स्थानिक नागरिकांनी तातडीने बचावकार्य सुरू केले. जखमींना तात्काळ जवळच्या रुग्णालयात दाखल करण्यात आले. पोलिसांनी नागरिकांना कोसळलेल्या हेलिकॉप्टरपासून दूर राहण्याचे आवाहन केले आहे, कारण कोणत्याही क्षणी स्फोट होण्याची शक्यता नाकारता येत नाही.
हेलिकॉप्टरमधील प्रवासी
हेलिकॉप्टरमध्ये पायलट आनंद कॅप्टनसह दिर भाटिया, अमरदीप सिंग आणि एस पी राम असे चार प्रवासी होते. यापैकी आनंद कॅप्टन गंभीर जखमी असून ते बोलण्याच्या स्थितीत नाहीत. इतर तीन प्रवासींची प्रकृती स्थिर असल्याची माहिती आहे.
काय झाले असावे?
हेलिकॉप्टर कोसळण्याचे नेमके कारण अद्याप स्पष्ट झालेले नाही. याबाबत पोलिसांनी अधिक तपास सुरू केला आहे. प्राथमिक माहितीनुसार, हेलिकॉप्टरमध्ये काही तांत्रिक बिघाड झाल्यामुळे हा अपघात झाला असण्याची शक्यता वर्तवली जात आहे.
प्रशासनाकडून सतर्कता
या घटनेनंतर जिल्हा प्रशासनाने सतर्कता वाढवली आहे. जिल्हाधिकारी आणि पोलीस अधीक्षक यांनी घटनास्थळी भेट देऊन पाहणी केली. याबाबत अधिक माहिती मिळाल्यावर देण्यात येईल, असे त्यांनी सांगितले.
https://youtube.com/shorts/TwW8ZPimS4A?si=Ic-U2mC6CK7pJm7N
विमानतळ प्रशासनाकडून चौकशी
या घटनेची गंभीर नोंद घेत मुंबई विमानतळ प्रशासनाने या प्रकरणाची चौकशी सुरू केली आहे. हेलिकॉप्टरची तपासणी करून या घटनेचे कारण शोधण्याचा प्रयत्न सुरू आहे.
हेलिकॉप्टर उद्योगावर प्रश्नचिन्ह
देशात हेलिकॉप्टर अपघातांची संख्या वाढत असून, यामुळे हेलिकॉप्टर उद्योगावर प्रश्नचिन्ह उपस्थित झाले आहे. हेलिकॉप्टरची सुरक्षा आणि देखभाल याबाबत योग्य ती पावले उचलण्याची गरज आहे, अशी मागणी सुरू झाली आहे
