पारगांव: धनाजी ताकवणे
दौंड तालुक्यातील कडेठाण येथे बिबट्याच्या हल्ल्यात एका शेतकरी महिलेचा दुर्दैवी मृत्यू झाला आहे. दौंड तालुक्यातील हि दुसरी घटना असून दौंड तालुक्यातील शेतकरी, शेतमजूर बिबट्याच्या दहशतीखाली आहेत. काही दिवसांपूर्वीच बोरीपार्धी हद्दीत बिबट्याने सहा महिन्याच्या बाळाचा बळी घेतल्यानंतर आता तालुक्यातील कडेठाण येथे शेतात काम करणाऱ्या शेतकरी महिलेवर बिबट्याने हल्ला करून महिलेचा बळी घेतल्याची धक्कादायक घटना घडली.
दौंड तालुक्यात आतापर्यंत जनावरावर हल्ले होताना पाहिले होते. परंतु आता मनुष्यावर हल्ले होण्याची दुसरी वेळ असून आता मात्र दौंड तालुक्यातील ग्रामस्थ आक्रमक झाले आहेत. गेल्या काही महिन्यात दौंड तालुक्यात बिबट्याने अक्षर:क्षा धुमाकुळ घातला आहे. भीमा नदीच्या पट्ट्यात असलेल्या दौंड तालुक्यातील कानगाव, हातवळण, नानगाव, कडेठाण तसेच शिरूर तालुक्यातील मांडवगण फराटा, गणेगाव, सादलगाव, वडगाव रासाई या भागात बिबट्याने तांडव केले आहे.
शेतकऱ्यांच्या पाळीव जनावरांची शिकार करणारा बिबट्या आता माणसाचीही दिवसाढवळ्या शिकार करू लागला आहे. जी भीती शेतकऱ्यांना आणि नागरिकांना होती, ती भीती आता खरी ठरू लागली आहे. वनविभागाच्या हलगर्जीपणामुळे दौंड तालुक्यात दोघांचा निष्पाप बळी गेला आहे. दौंड तालुक्यातील कानगाव आणि कडेठाण गावच्या शिवेवर असलेल्या कडेठाण हद्दीत शनिवारी (दि ७) सायंकाळी चार वाजताच्या आसपास शेतकरी धावडे यांच्या शेतात काम करणाऱ्या लताबाई बबन धावडे (वय ५० , रा. कडेठाण) या शेतात काम करत असताना यांच्यावर बिबट्याने अचानक हल्ला करून त्यांना उसाच्या शेतात फरफटत नेले.
या हल्ल्यात नरभक्षक बिबट्याने अक्षरशा या महिलेचे लचके तोडले आणि त्यांचा जागीच मृत्यू झाला. या घटनेने पुन्हा एकदा दौंड तालुक्यात खळबळ उडाली असून शेतकरी आणि ग्रामस्थ आक्रमक झाले आहेत.
