शिक्रापूरः येथे एका तीन वर्षीय चिमुरडीवर १४ वर्षांच्या अल्पवयीन मुलाने अत्याचार केल्याची धक्कादायक घटना समोर आल्याने सर्वत्र खळबळ उडाली आहे. घरात एकटी असल्याचे पाहून अल्पवयीन आरोपीने अत्याचार केल्याची माहिती मिळत आहे. या प्रकरणी शिक्रापूर पोलीस स्टेशनमध्ये १४ वर्षीय अल्पवयीन मुलावर अत्याचाराचा गुन्हा दाखल करुन त्याला पोलिसांनी ताब्यात घेऊन त्याची रवानगी बाल सुधार कारागृहात केली आहे.
मिळालेल्या माहितीनुसार, शिक्रापूर येथील पिडीत तीन वर्षीय चिमुरडीची आई घाबाहेर गेली होती. यावेळी पीडित मुलगी घरात एकटीच होती. याचाच फायदा घेत हा १४ वर्षीय अल्पवयीन मुलगा घरात घुसला आणि त्याने तीन वर्षीय मुलीवर अत्याचार केला. या घटनेमुळे मोठी खळबळ उडाली आहे.
पीडित मुलीची आई घरी आली असता आरोपीने त्या ठिकाणहून पळ काढला. याबाबत पिडीत मुलीच्या आईने शिक्रापूर पोलीस स्टेशन येथे फिर्याद दिली आहे. त्यानुसार पोलिसांनी अल्पवयीन मुलावर बाल लैंगिक अत्याचारसह बलात्कार प्रकरणी गुन्हा दाखल केला आहे. पुढील तपास पोलीस निरीक्षक दिपरतन गायकवाड यांच्या मार्गदर्शनाखाली महिला सहाय्यक पोलीस निरीक्षक रोहिणी सोनावले व पोलीस नाईक उमेश जायपत्रे करत आहेत.