जेजुरीः देशाच्या स्वातंत्र्यासाठी लढणाऱ्यांचे दैवत म्हणजे खंडोबा असून, जेजुरी गडावर आल्यामुळे खऱ्या अर्थाने माझे देवदर्शन झाले आहे. समाज जागृतीचे हे श्रद्धा केंद्र असून, धर्म याच श्रद्धेमुळे टिकला आहे, असे प्रतिपादन राष्ट्रीय स्वयंसेवक संघाचे सरसंघचालक डॉ. मोहन भागवत (DR. mohan bhagavat) यांनी व्यक्त केले. श्री मार्तंड देव संस्थानाला भेट देत त्यांनी खंडोबा देवाचे दर्शन घेत आपल्या भावना यावेळी व्यक्त केल्या. देवसंस्थान आणि जेजुरी ग्रामस्थांनच्या वतीने सरसंघचालक मोहन भागवत यांना मानपत्र देऊन त्यांचा सन्मान करण्यात आला. येथील द्वादश मल्हार दर्शन सृष्टीचे भूमिपूजन सरसंघचालक यांच्या हस्ते करण्यात आले.
गडावर येत्या काळात नवीन भक्तनिवास उभारण्यात येणार असून, गुरूकुल पद्धतीचे शिक्षणही उपलब्ध करण्यात येणार असल्याची माहिती प्रमुख विश्वस्त अनिल सौंदडे यांनी दिली. यावेळी श्री मार्तंड देव संस्थानचे प्रमुख विश्वस्त अनिल सौंदडे, विश्वस्त अभिजित देवकाते, विश्वस्त राजेंद्र खेडेकर, विश्वस्त मंगेश घोणे, विश्वस्त अॅड. विश्वास पानसे, विश्वस्त अॅड. पांडुरंग थोरवे, विश्वस्त पोपट खोमणे, पदसिद्ध विश्वस्त तथा तहसिलदार विक्रम राजपूत, व्यवस्थापक आशिष बाठे उपस्थित होते. तसेच यावेळी आयोजित केलेल्या कार्यक्रमात सरसंघचालक यांचे स्वागत मंगेश घोणे, प्रास्ताविक अनिल सौंदडे यांनी केले. तर मानपत्राचे वाचन पोपट खोमणे यांनी केले. सरसंघचालक यांनी यावेळी देवाचा तळी भंडारा करुन देवाची खंडा तलवारीची कसरत देखील पाहिली.
समरसतेच्या कार्यासाठी मानपत्र
देव, देश, धर्म टिकावा म्हणून मंदिर, पाणी आणि स्मशान या विषयांवर समरसतेचे वातावरण तयार करण्यासाठी देशभर अग्रेसर म्हणून कार्य करत आहात. म्हणून हे मानपत्र प्रदान करण्यात आल्याचे देव संस्थानने म्हटले आहे. ज्यांनी वर खेचायचे आहे त्यांनी थोडे वाकले पाहिजे, ज्यांना वर यायचे आहे, त्यांनी थोड्या टाचा उंच केल्या पाहिजेत. त्याच वेळेस समता आणि समरसता प्रस्तापित होईल, या सरसंघचालकांच्या विधानाचाही मानपत्रात स्थान देण्यात आले आहे. श्री खंडेरायाची पगडी, घोंगडे आणि भारतमातेच्या प्रतिमेने संरसंघचालकांचे स्वागत करण्यात आले.
द्वादश मल्हार दर्शन सृष्टीचे भूमिपूजन
महाराष्ट्र आणि कर्नाटक राज्यातील खंडोबा देवाची प्रमुख १२ ठाणी आहेत. याचे दर्शन जेजुरीत येणाऱ्या भाविकांना एकाच ठिकाणी व्हावे, या उद्देशाने देवसंस्थान आणि पूरातत्व विभागाच्या वतीने द्वादश मल्हार दर्शन सृष्टी उभारण्याचे कार्य होणार आहे. त्याचे भूमिपूजन आणि कोनशिलेचे उद्घाटन सरसंघचालकांच्या हस्ते झाले.
भौतिक जगातील वैभवाबरोबरच आध्यात्मिकतेतील प्रविणता सांगणारा आपला धर्म आहे. जेजुरी गडाच्या परिसरात परकीय आक्रमक स्वस्थपणे झोपू शकला नाही. धर्म ज्या श्रद्धेमुळे आहे. त्याची जागृती करणारे हे ठिकाण आहे.
– डॉ. मोहन भागवत, सरसंघचालक, रा.स्व.संघ
