भोर : तालुक्यातील नसरापूर येथे जमिनीच्या मालकी हक्कावरून सुरू असलेल्या वादातून तारकंपाउंडची तोडफोड केल्याची घटना समोर आली आहे. गट क्रमांक ८८ मधील ८.३९ आर क्षेत्राच्या जागेवरील तारकंपाउंडचे नुकसान करण्यात आल्याचा आरोप असून, या प्रकरणी पाच जणांविरोधात राजगड पोलीस ठाण्यात गुन्हा दाखल करण्यात आला आहे. या घटनेमुळे नसरापूर परिसरात चर्चेला उधाण आले आहे.
याबाबत पोलिसांनी दिलेल्या माहितीनुसार, संबंधित जागेवर तारकंपाउंड उभारण्यात आले होते. मात्र, जमिनीच्या वादातून २२ ऑक्टोबर रोजी सकाळी साडेदहा वाजण्याच्या सुमारास काही व्यक्तींनी या ठिकाणी जाऊन तारकंपाउंडची तोडफोड केल्याची फिर्याद देण्यात आली आहे. संबंधितांनी संगनमत करून कामगारांच्या मदतीने जागेत अनधिकृत प्रवेश केला आणि तेथील तारकंपाउंडचे नुकसान केले, असा आरोप फिर्यादीने केला आहे.
या तोडफोडीत अंदाजे १ लाख ५० हजार रुपयांचे आर्थिक नुकसान झाल्याचे तक्रारीत नमूद करण्यात आले आहे. या प्रकरणी गणेश चांडक, लक्ष्मीकांत दिग्रजकर, महेश पेने, आनंता भडवळे आणि अनिल निवंगुणे अशा पाच जणांविरोधात राजगड पोलीस ठाण्यात गुन्हा दाखल करण्यात आला आहे.
जमिनीच्या वादातून थेट तारकंपाउंडची तोडफोड झाल्याने हा प्रकार चर्चेचा विषय ठरला आहे. जमिनीच्या मालकी हक्कासंदर्भातील वाद कायदेशीर मार्गाने सोडविण्याऐवजी अशा प्रकारे मालमत्तेचे नुकसान केल्याचा आरोप करण्यात आला आहे.
दरम्यान, या घटनेची नोंद राजगड पोलिसांनी घेतली असून, नेमकी तोडफोड कोणत्या कारणातून करण्यात आली, यामागे आणखी काही वाद आहेत का, तसेच या प्रकरणातील सर्व संबंधितांची भूमिका काय आहे, याचा तपास पोलीस करीत आहेत.
