लोणी काळभोर (पुणे) : लोणी काळभोर ग्रामपंचायत हद्दीतील महात्मा फुले नगर परिसरातील जी.एम. ग्रुपचा गणपती हा परिसरातील नागरिकांचे प्रमुख श्रद्धास्थान आहे. सामजिक कार्य करणाऱ्या काही मंडळापैकी जी.एम ग्रुपचा गणपती म्हणून ओळखल्या जाणाऱ्या मंडळाचा उल्लेख महत्त्वाचा ठरतो आहे. केवळ गणेशोत्सवच नव्हे तर वर्षभर विविध सामाजिक काम करताना सर्वस्पर्शी उपक्रम राबविण्याची हातोटी या मंडळाने साध्य केली आहे.
लोकवस्ती विरळ असताना त्या परिसरात राहणाऱ्या लोकांनी सुरू केलेल्या गणेशोत्सवाला वेगळे स्वरूप प्राप्त झाले. त्यांचा विश्वास, प्रेम, आपुलकी आणि सहकाराच्या बळावर मागील १५ वर्षापेक्षा जास्त काळ मंडळ येथे कार्यरत राहिले. त्यातून समता, बंधुता, राष्ट्रीयत्व वाढीस लागले आहे. ‘शिवसृष्टी’, ‘पाणी आडवा, पाणी जिरवा’, ‘बेटी बचाव, बेटी पढाओ’, पूरग्रस्त, शेतकरी आत्महत्या, भारतरत्न, देशातील शास्त्रज्ञ, तसेच पुण्यात पहिल्यांदा पर्यावरण वाचवा हा संदेश देणारा मूर्तिदान व निर्माल्यदान ही संकल्पना १५ वर्षांपूर्वी राबवणारे पहिले मंडळ आहे.
