माझ्या दृष्टीने गावचा विकास हाच पक्ष आहे, त्यामुळे मी निधी कमी पडू देणार नाही – आ.तापकीर

शिवापूर (ता.हवेली ) येथे विविध विकास कामांचे भूमिपूजन

राजगड न्युज नेटवर्क

हवेली : शिवापूर (ता. हवेली) येथे कोंढणपूर फाटा ते सिंहगड रस्त्यावरील असलेल्या शिवापूर ते श्रीरामनगर दरम्यानच्या गेली पाच वर्षे रखडलेल्या रस्त्याचे भूमिपूजन करण्यात आले त्यावेळी माझ्या दृष्टीने गावचा विकास हाच पक्ष आहे, त्यामुळे मी निधी कमी पडू देणार नाही असे प्रतिपादन तापकीर यांनी केले.

शिवापूर (ता. हवेली) येथे कोंढणपूर फाटा ते सिंहगड रस्त्यावरील असलेल्या शिवापूर ते श्रीरामनगर दरम्यानच्या रस्त्याचे भूमिपूजन करण्यात आमदार भीमराव आण्णा तापकीर यांच्या हस्ते करण्यात आले.

यावेळी बोलताना तापकीर म्हणाले की, खडकवासला विधानसभा मतदार संघातील नांदेड ते पानशेत, कोंढणपूर ते तोरणा या रस्त्यांची कामे सुरू झाली आहेत. खर तर या रस्त्याचे काम लवकर होणे गरजेचे होते मात्र काही ठेकेदार हरामखोर असतात. कामे अर्धवट सोडतात, तर कधी निकृष्ट करतात. याकडे आपल्या भागातील सरपंच, उपसरपंच, सदस्य यांनी लक्ष ठेवणे आवश्यक आहे. ज्या प्रमाणे निवडून येण्यासाठी नियोजन करता, तसेच नियोजन आपल्या गावाच्या विकासासाठी करा असा खोचक सल्लाही दिला. यावेळी पाण्यासाठी मोदी सरकारने ६२ कोटी ५० लाख रुपयांचा निधी उपलब्ध करून दिला आहे. त्यामुळे मोदी सरकारचे आभार मानून पुणे जिल्ह्याचे पालकमंत्री अजित पवार यांचे मतदार संघातर्फे अभिनंदन केले. तसेच खडकवासला विधानसभा मतदार संघात केलेल्या विकास कामांची माहिती देण्यात आली.

जिल्हाप्रमुख रमेश कोंडे म्हणाले की, या दरम्यानच्या रस्ता हा डांबरीकरणाचा करीत असताना दिवंगत माजी जिल्हा परिषद सदस्य सोमनाथ लांडगे यांनी बंद पाडून सदर रस्ता काँक्रिटिकरणचा पाहिजे अशी मागणी केली होती. त्या मागणीला आमदार तापकीर यांच्या मार्गदर्शनाखाली व भागातील सरपंच यांच्या पाठपुराव्यामुळे सरकारने निधी मंजूर केला, व खऱ्या अर्थाने मागणीला एक प्रकारे यश आले याची आठवण करून दिली.

याप्रसंगी शिवसेना जिल्हाप्रमुख रमेश कोंडे, माजी पं. स. सदस्य अनिरुद्ध यादव, सरपंच अण्णा दिघे, भाजपा जिल्हा उपाध्यक्ष दीपक रजपूत, राष्ट्रवादी काँग्रेसचे खडकवासला विधानसभा अध्यक्ष राजेंद्र पवार, भाजपा शिवगंगा खोऱ्याच्या अध्यक्षा दीपाली वाव्हळ, चंद्रकांत हवलदार, माजी सरपंच सतीश दिघे, अमोल कोंडे, स्वप्नील जगताप, राकेश गाडे, तंटामुक्ती अध्यक्ष उमेश दिघे, उपसरपंच राजू सट्टे, राजेंद्र दिघे, सुनील नावडकर, ओमकार हवलदार आदी उपस्थित होते.

राष्ट्रीय किक बॉक्सिंग स्पर्धेत महाराष्ट्राला सुवर्णपदक जिंकून देणाऱ्या खेळाडूंचा सत्कार

नुकत्याच झालेल्या राष्ट्रीय किक बॉक्सिंग स्पर्धेत महाराष्ट्राला सुवर्णपदक जिंकून देणाऱ्या स्नेहा दिघे, रोहित खाडे यांचा त्यांच्या मार्गदर्शक योगेश सुर्वे यांचा सत्कार करण्यात आला.